مەترسیا بهێزبوونا داعشێ ل سووریێ یا هەی
فەهیم تاشتەکین بسپۆرێ کاروبارێن سیاسی دیار دکەت، نها رەوشا رۆژهەلاتا ناڤین گەلەک یا خرابە، ژ بەر شەرێ د ناڤبەرا حەماسێ و ئسرائیلێ دا دبیت گوهۆڕین گەلەک مەزن روو بدەن، بەرپرسێن ئەمریکا و ئێکەتیا ئۆرۆپا ژی یێ دبێژن ئێدی رەوش ل رۆژهەلاتا ناڤین ڤەناگەریتە ڤە بۆ بەری ئێرشا حەماسێ یا ل سەر ئسرائیلێ، ئەڤ داخۆیانیە ژ قەستا نینن و ئاماژێن مەزنن کو دێ گوهۆڕینێن مەزن ل رۆژهەلاتا ناڤین روو دەن، چونکی ئسرائیل د رەوشا نها دا یا بەرهەڤ نینە ب چو رەنگەکێ ئاگربەستێ راگەهینیت، ئسرائیلێ دڤێت بگەهیتە هندەک ئارمانجێن خوە، ل ئالیێ دی ئەو وەلاتێن ل پشت حەماسێ ژی ب هەموو رەنگەکێ هاریکاریا وێ دکەن دا ئسرائیلێ لاواز بکەن، د هەمان دەمی دا ئەمریکا ژی ب هەموو شیانێن خوە هاریکاریا ئسرائیلێ دکەت.
ناڤهاتی ئەو یەک ژی دیار کر، یا نها روو ددەت بەلکو ئەم وەسا دبینین شەرەکە د ناڤبەرا ئسرائیلێ و حەماسێ دایە، لێ د راستی دا شەر گەلەک ژ هندێ مەزنترە و ژ بەر پشتەڤانیا وەلاتێن جیهانێ بۆ هەر دو ئالیان دبیت شەر بەرفرەهتر ژی لێ بهێت، د هەمان دەمی دا ئەمریکا و وەلاتێن ئێکەتیا ئۆرۆپا یێ کار دکەن دا بشێن پرسا فەلەستینێ ژی چارەسەر بکەن و نها پتر ژ هەر دەمەکێ بەحسێ راگەهاندنا دەولەتا فەلەستینێ ژی دهێتە کرن، ژ بەر ڤێ یەکێ ژی دبیت ل رۆژهەلاتا ناڤین رەوش گەلەک ئالۆز ببیت، ئێک ژ وەلاتێن کو مەترسیا هندێ ل سەر هەیە رەوشا وێ گەلەک ئالۆز ببیت ژی سووریێ یە، چونکی هێشتا ئالۆزیێن مەزن ل سووریێ هەنە، داعش ژی دشێت مفایەکا باش ژ ئالۆزیێن نها وەربگریت و جارەکا دی ل سووریێ دەست ب ئێرشێن دژوار بکەت.
بسپۆرێ کاروبارێن سیاسی ئەو یەک ژی دیار کر، دەمەکە بەرپرسێن ئەمریکا دبێژن ل سووریێ مەترسیا بهێزبوونا داعشێ یا هەی، دیارە وان پێزانینێن باش ل بەر دەست هەنە و ژ بەر ڤێ یەکێ ژی دبێژن ئەو جارێ بەرهەڤ نینن هێزێن خوە ژ باکورێ سووریێ ڤەکێشن، بێگومان بهێزبوونا داعشێ ل سووریێ دێ بیتە ئەگەرێ ئالۆزیێن مەزن، هەروەسا دێ رێ بۆ گوهۆڕینێن مەزن ژی ڤەکەت، ژ بەر ڤێ یەکێ ژی هەتا نها وەلاتێن عەرەبی بەرهەڤ نینن ب کریاری ل دژی ئسرائیلێ چو کارەکێ بکەن.
