مەترسیا هەڕفینێ ل سەر خانیێن كەڤنارێن ئاكرێ هەیە
رەمەزان زەكەریا:
هیوا شەمال، رێڤەبەرێ شوونوار و كەلەپۆرێن ئاكرێ بۆ ئەڤرۆ دیار كر، خانیێن كەڤنارێن ئاكرێ سالانە ل وەرزێ باران بارینێ مەترسیا هەڕفینێ ل سەر دروست دبیت، چەندین خانی ژی ژ ناڤ چوونە.
ناڤبری گۆت: «ل سالا 2021 مە پلانەك دایە حكومەتێ، كو بشێین هژمارەكا خانیا نووژەن بكەین، ئەو خانی ژ وەلاتیان بهێنە كڕین و بهێنە نووژەنكرن و ببنە ئۆتێل و مۆتێل و كافێتریا، بۆ وێ چەندێ گەشتیار زێدەتر سەرەدانا ئاكرێ بكەن، وەلاتیێن گەرەكێن كەڤنارێن ئاكرێ هەژار و نەشێن ل گۆر یاسا شوونواران خانیێن خۆ نووژەن بكەنە».
گۆتژی: «بۆ قووناغا ئێكێ 40 خانی هاتینە دەستنیشانكرن، كو بهێنە نووژەنكرن، ژ بەركو هژمارا خانیێن كەڤنار هزار و 800 خانینە، مە بەرنامە هەیە ب چەندین قووناغان هەموو خانیێن كەڤنار بهێنە نووژەنكرن».
