مەترسیێن لسەر رۆژئاڤایێ کوردستانێ بۆ شاشیێن یەپەگێ ڤەدگەڕیت
ئەڤرۆ نیوز، قائید میرۆ:
دکتۆر سامان شالی کەسایەتیێ سیاسی یێ کورد بۆ رۆژناما ئەڤرۆ نیوز گۆت: ( سیاسەتا یەپەگێ شاشیێن مەزن تێدا ھەنە و پێدڤی بوو شێوازێ خەباتا خوە ل رۆژئاڤایێ کوردستانێ بگۆھۆڕن و ئالایێ کوردستانێ ھاتبا بلندکرن، نەک ئالایەکی بلند بکەن وێنەیێ عەبدولا ئوجەلانی لسەر بیت و بکەڤنە بن کاریگەریێن سیاسەتا پەکەکێ، ھەروەھا رێککەفتن ھاتبا کرن دگەل لایەنێن کوردی یێن رۆژئاڤایێ کوردستانێ، کاک مەسعود بارزانی چەندین جاران بزاڤکرینە بۆ رێکخستنا ناڤمالا کوردان ل سووریێ ھەتا چەند کۆمبوونەک ل دھۆکێ و ھەولێرێ ژی ھاتنە ئەنجامدان، بەلێ مخابن یەپەگێ خوە ل خەتێ کوردان دوور خست و بەرھەڤ نەبوو دگەل ئەنەکەسێ بگەھیتە رێککەفتنێ، ئەڤە ژی بۆ بەھانەیەک بۆ تورکیا یەپەگێ وەکو پشکەک ژ پەکەکە وەسف بکەت).
دکتۆر سامان شالی ئاماژەکر” پێدڤیە یەپەگە و ھەموو پارت و ھێزێن کوردی ل سووریێ دگەل ھەرێما کوردستانێ ھەماھەنگیێ بکەن بۆ دانانا پلانەکێ، چونکە بیرا مەیە هەکە کاک مەسعود بارزانی نەبایە ھێزا پێشمەرگەی نەدگەھشتە کۆبانێ، بەلێ کاک مەسعود شیا ئەمریکا و تورکیا رازی بکەت بۆ ھنارتنا ھێزا پێشمەرگەی، ئەڤە ژی بۆ ئەگەر کۆبانێ نەکەڤیت و ھەر ددەستێ کورداندا بمینیت.
