مەحما خەلیل: 153 ملیار دینار بۆ ئاڤەدانكرنا شنگالێ و بەعاجێ و تەلەعفەرێ هاتنە تەرخانكرن
دهۆك، لەزگین جوقی:
ئەندامێ پەرلەمانێ ئیراقێ دیار كر، پشتی سوودانی سەرەدانا شنگالێ كری، گوژمێ 153 ملیار دیناران بۆ ئاڤەدانیا دەڤەرا شنگالێ و بەعاج و تەلەعفەرێ تەرخانكرن و دبێژیت: مە دڤێت ل گور رێژا ئاكنجی و وێرانبوونا دەڤەران پارە بهێتە بەلاڤكرن.
مەحما خەلیل، ئەندامێ پەرلەمانی ئیراقێ بۆ ئەڤرۆ خویا كر، پشتی سەرەدانا سەرۆكێ حوكمەتا ئیراقێ محەمەد شیاع سوودانی بو دەڤەرا شنگالێ رازیبوون ل سەر تەرخانكرنا گوژمێ 153 ملیار دیناران بۆ ئاڤەدانیا دەڤەرێ هاتە كرن و گۆت: «مە دڤێت سوودانی سەرەدانەكا مەیدانی بۆ شنگالێ و گرعزێر و سیبا شێخدر و هەمی دەڤەرێن سەر ب شنگالێ ڤە بكەت، داكو خزمەتا هەمی دەڤەران بهێتە كرن».
گۆتژی: «شنگال یا وێران بووی و تووشی جینۆسایدێ بووی و هێشتا خەلكێ شنگالێ ئاوارەنە و گۆرێن ب كۆم هێشتا ل شنگالێ هەنە، دیسا چارەنڤسێ پتر ژ دو هزار كەسان دیار نینە، لەو داخواز دكەین هەڤكاریا شنگالێ بهێتە كرن».
مەحما خەلیل زێدەتر گۆت: «مە ب نڤیسارێن فەرمی داخوازا بجهئینانا پڕۆژەیێن گرنگ بۆ شنگالێ كریە، ژ وانا ژی: پڕۆژەیێ ئاڤا شنگالێ و زانكۆیا شنگالێ و قەرەبوویا جۆتیارێن شنگالێ و ئاڤاكرنا سایلۆیا شنگالێ«.
