مەروا تاكە كچا دهۆكییە د ناڤ ڕێزێن هەلبژارتیێ ئیراقێ دا
هەلبژارتیێ ئیراقێ ل سەر ئاستێ پێشكەڤتیان بۆ كچان د نوكە دا پشكدارە د قارەمانییا رۆژئاڤا ئاسیا یا فوتبۆلێ بۆ یاریگەهێن مەزن ئەوا هەڤڕكیێن وێ ل باژێرێ جەدە یێ سعۆدیێ دهێنە كرن.
دناڤا پێكهاتیێ هەلبژارتیێ ئیراقێ دا هەشت یاریزانێن كوردستانی پشكدارن ژ وانا مەروا جیان تاكە یاریزانا پارێزگەهێ و یانەیا ئافرەتێن دهۆك یا وەرزشی یە دناڤ دا ئەوا د دیدارەكێ دا كەیفخوەشییا خوە دیاركر وەكو یاریزانا كوردستانی و دیاركر ل پارێزگەهێ كۆمەكا باش یا یاریزانێن كچ خودان شیان و بەهرەمەند هەنە.
زێدەتر ناڤهاتی گۆت: پێخوەشحالم وەكو ئەندامەكا تیما هەلبژارتیێ ئیراقێ و پشكداری د قارەمانییا رۆژئاڤا ئاسیا دا دكەین، هەرچەندە هەتا هەشت یاریزانێن كوردستانی د ناڤ ڕێزێن تیمێ دانە لێ ژبەركو د یاریگەهێن مەزن دا دهێنە كرن ڕێژەیا یاریزانێن پارێزگەهێ دكێمن، هەكەر نە ل یانەیا ئافرەتێن دهۆك ب خوە زێدەتری 10 یاریزانێن وێ ل سەر ئاستێن تازەپێگەهشتی، لاوان و پێشكەڤتیان دناڤ ڕێزێن هەلبژارتیێن ئیراقێ دانە و ئەڤە ژی ڕێژەیەكا گەلەك باشە.
هەژی گۆتنێ یە هەلبژارتیێن ئیراقی، سعۆدیێ، ئوردن، ئیمارات، فلەستین و لوبنان پشكدارن ل سەر دو كۆمان هاتینە بەلاڤكرنن سەركەڤتیێن هەر كۆمەكێ دو هەلبژارتی دەربازنە چارگۆشەیا زێرین.
