مەزاختنا زێدە د ھەیڤا رەمەزانا پیروزدا حەرامە
ئەڤرو نیوز:
دھەیڤا رەمەزانا پیروزدا،خەلک زێدە مەزاختنێ ل جورێن خوارنێ و ڤەخوارنێ و کەل و پەلێن دی دکەن، مەزاختن ژی یا بوویە چاڤ لێ کرن و ئەڤجا پێ چێبیت یان پێ چێنەبیت و زانایێن ئاینی ژی دبێژن زێدە مەزاختن ل ھەر دەمەکی یا حەرامە و ئیسلامێ رێک نەدایە ڤێ چەندێ .
جەلال عەبدولرحمان وەک وەلاتیەک ل دۆر ڤێ چەندێ دبیّژیت:دھەیڤا رەمەزانا پیروز دا خەلک ب شێوەکێ بەرفرەھـ قەستا بازاری و ھەموو جورێن خوارنێ و ڤەخوارنێ نەخاسمە ل دانێ فتارێ ئامادە دکەن، زێدەباری وێ چەندێ گۆھورین و کرینا کەل و پەلێن ناڤ مالێ براستی یا بویە چاڤ لێ کرن و یێ پێ چێبیت و یێن پێ چێ نەبیت دڤێت ژ ھەموو لایان ڤە خوە نوو بکەت، ھەکە ھەر کەسەک ل دووڤ پێدڤیێن خوە مەزاختنێ بکەت، روژانە دناڤ مالێن مە ھەموویان دا نیڤا وی تشتی ناھێتە خوارن ھندی دھێتە رێتن و دیسان جورێن شریناھیان و شەربەتان ژی دھێتە ئامادەکرن و دیسان ھەر نوکە یا دەست ب کرین و گۆھورینا کەل و پەلێن ناڤ مالێ دھێتە کرن، چونکە دێ بیتە جەژن و خەلک دێ ھێتە چەژنێ، دڤێت تشتێن ناڤ مالێ ژی بھێنە نووکرن، ب دیتنا من پێدڤیە دڤێ ھەیڤا پیروزدا مروڤ ژھەمو ھەیڤێن دی کێم مەزاختن و پتر نێزیکی خودایێ و تاعەتی بکەت .
رەمەزان محەمەد خودانێ شریناھیێ گۆت: د روژانێن رمەزانێ دا پتر ژ ھەر وەختەکێ دی ئەم شریناھیان وەک شەربەت و بەقلاوە و زەلابی و شریناھیێن دی دھێنە فروتن و دەربارەی بھایێن شریناھیان ب شێوەکێ گشتی دناڤا بازارێ دھوکێ دا ئەرزانن و گران نەبوینە و بەلکو ئەم ژی دگەل وێ چەندێ نە کو ھەر کەسەک ل گۆری پێدڤیێن خوە ھەر تشتەکی بکریت نەک بەس شریناھی، چونکە روژانە بۆ فتارێ ئەڤ تشتەکێ دھێنە خوارن و ڤەخوارن و ھەموو کەسان وەک ئێک پێ چێ نابیت و بارێ وان یێ ئابووری نەیێ باشە لەورا ھەکە ل دووڤ پێدڤیێن خوە مەزاختنێ بکەت.
شێخ ردوان بەروشکی ماموستایەکێ ئاینی دیارکر زێدە مەزاختن نەبتنێ ل ھەیڤا رەمەزانا پیروز بەلکو ل ھەروەختەکی بو ھەر تشتەکی د ئاینێ پیروزێ ئیسلامێ دا یا حەرامە و رێک ژی بو ڤێ چەندێ نەھاتیە دان،لەورا پێدڤیە ھەر کەسەک ژمە ل دووڤ پێدڤیێن خوە مەزاختنێ بکەت، دڤێت مروڤ پتر ب گرتنا روژی و نڤیژو زەکاتێ خوە نێزیکی خودێ تەعالا بکەت، وەک پێغەمبەرێ مە سلاڤێت خودێ ل سەر بن دبێژیت ھەر ژ دەست نڤێژ و شوشتنێ و تشتێن تو دخوەی و ڤەدخوەی نابیت زێدە مەزاختنێ بکەی ، ئەگەرێ زێدە مەزاختنێ خودێ تەعالا دێ مە توشی گەلەک قەیرانا کەت، لەورا پا پێدڤیە خوە ژڤێ چەندێ دویر بکەین،ل دووڤ گوتنا خودێ تەعالا و پێغەبەرێ وی بچین و چونکە پێغەبەرێ مە شیرەتا ل مە دکەت، تایبەتی دھەیڤا رەمەزانێ دێ بینین خەلکێ مە گەلەک شەربەت و بەقلاوە و شریناھی و تشتێن دی ئامادە دکەن بو فتارێ و بەلکو یێ ب روژیە و چاڤێن وی دچنێ پشتی بانگ ددەت نیڤا وان تشتان ناخوەن و دێ ھێنە ھاڤێتن و گوتنا پێغەبەرێ سلاڤێن خودێ لسەر بن دبێژیت،دڤێت مروڤ گەدا خوە بکەتە سێ پشک بۆ خوارنێ و ڤەخوارنێ و ھەناسێ داکو ساخلەمیا مە یا پاراستی بیت و دیسان ئیسلامەتیێ تەئکید ل وێ چەندێ کریە کو دەمێ مروڤی پێ چێ بیت ھاریکاریا برایێ خوە یێ موسلمان بکەت نەک زێدە مەزاختنێ بکەت .