مەزنترین بەنداڤ ل سەر ئاستێ پارێزگەها دهۆكێ ل ئاكرێ دێ هێتە دروستكرن
ئاكرێ، رەمەزان زەكەریا:
مەزنترین بەنداڤ ل سەر ئاستێ پارێزگەها دهۆكێ ل گوندێ باكورمان ل سنوورێ دەڤەرداریا ئاكرێ دێ هێتە دروستكرن، كو شیانێن عمباركرنا 500 ملیۆن مەترێن سێجا یێن ئاڤێ هەنە.
ئەندازیار رەمەزان شەریف، رێڤەبەرێ ئاڤدێریا ئاكرێ بۆ ئەڤرۆ گۆت: «حوكمەتا هەرێما كوردستانێ پێشنیارا هەشت بەنداڤان كربوو، بۆ حوكمەتا فیدرال، وەك ئێكەم قۆناغ بڕیارا دروستكرنا سێ بەنداڤان ل هەرێما كوردستانێ هاتیەدان، كو ئێك ژ وان بەنداڤان دكەڤیتە گوندێ باكورمان ل دەڤەرداریا ئاكرێ«.
ناڤبری گۆتژی: «بەنداڤا باكورمان مەزنترین بەنداڤە ل سەر ئاستێ پارێزگەها دهۆكێ، كو بلنداهیا وێ 112 مەترن و شیانێن عمباركرنا 500 ملیۆن مەترێن سێجا یێن ئاڤێ هەنە و بڕیارە د دەمەكێ نێزیك دا بكەڤیتە د وارێ بجهئینانانێ دا».
ئەندازیار رەمەزان خویا ژی كر، بەنداڤا باكورمان دێ پشتبەستنێ ل سەر ئاڤا رووبارێ خازر و رووبارێ ریێ زەر كەت و دێ مفا ژبۆ هەرسێ دەڤەرداریێن ئاكرێ و بەردەڕەش و شێخان و كەرتێ چاندنێ هەبیت، دیسا دێ 24 مێگاواتێن كارەبێ ژی بەرهەم ئینیت.
