مەزنترین قارەمانییا تیكۆنجتسۆ یا نێڤدەولەتی ل دهۆكێ دەستپێکر
قەیس وەیس:
دوهی ب شێوەكێ فەرمی هەڤڕكیێن قارەمانییا نێڤدەولەتی بۆ یارییا تیكۆنجتسۆ والسكی ل هۆلا گرتییا یانەیا سەنحاریب ل باژێرێ دهۆكێ دەستپێكرن، ئەوا دهێتە هژمارتن ئێك ژ مەزنترین قارەمانیێن نێڤدەولەتی ب پشكدارییا 13 وەلاتێن جیهانێ، پشتی 12 وەلاتان نەشیاین پشكداریێ بكەن ژبەر ئەگەرێن جودا.
ل دۆر ڤێ قارەمانیێ مەحمود ئیبراهیم عەلی سەرۆكێ فدراسیۆنا تیكۆنجتسۆ والسكییا ئیراقێ بۆ رۆژنامەیا ئەڤرۆ گۆت: هەرچەندە بڕیار بوو 25 هەلبژارتیێن وەلاتێن ئاسیا، ئەفریقیا و ئۆرۆپا پشكداربن، لێ بمخابنی ڤە پڕانییا وان ب بوهانا تڕسا شەڕێ د رۆژهەلاتا ناڤەڕاست دا دناڤبەرا ئیران، سوریا، لبنان دگەل ئیسرائیل دا و ئیراق ژی دانابوو پشكەكا ئەڤان شەڕان، سەرباری مە هەموو پێزانین و داتایێن هەرێما كوردستانێ بۆ وان دیاركربوو كو ئێك ژ ئارامترین دەڤەرە ل رۆژهەلاتا ناڤەڕاست، ئەو هەلبژارتیێن پشكدار خودان شیانن وەكو ئەلمانیا، توركیا، ئیمارات و قەتەر، دبینم دێ هەڤڕكییەكا بهێز هەبیت و گەشبینم دێ قارەمانی یا ب سەركەڤتی بیت.
ژلایەكێ دووڤە ناڤهاتی گۆت: زێدەتری 250 یاریزانێن كچ و كوڕ بۆ ژیێن جودا پشكدارن و هەڤڕكیێن وان دێ ل دووڤ سیستەمێن یاریێ هەتا 15ێ ڤێ مەهێ بەردەوام بیت، ئەڤ روودانە مەزنترین چالاكییە ل سەر ئاستێ ئیراقێ و عەرەبی كو 13 وەلاتێن پشكدار ژ كێشوەرێ، ئاسیا، ئەفریقیا و ئۆرۆپا نە، سۆپاسیا بەرپرسێن حكومی و حزبی و دەزگەهێن وەرزش یێن پارێزگەها دهۆكێ دكەیم ب شێوەكێ گەلەك باش دگەل مە د هاریكارن و پشتەڤانن و ئەڤە ژی خالا سەرەكی یا سەركەفتنا ڤێ قارەمانیێ یە.
ژلایێ خوەڤە شیمال محەمەد سالح راهێنەرێ یانەیا ئافرەتێن دهۆك و هەلبژارتیێ ئیراقێ ل سەر ئاستێ كچان گۆت: پێخوەشحالین وەكو 25 راهێنەر و یاریزان ژ پارێزگەهێ د ناڤ رێزێن هەلبژارتیێ ئیراقێ دا پشكداری قارەمانییا نێڤدەولەتی بووینە، سێ راهێنەرین و 15 یاریزانێن كچ وحەفت یاریزانێن كوڕ بۆ ژیێن پێشكەفتی كوڕان، كچان و لاوان ژ سەرجەجێ 43 یاریزانێن ب ناڤێ هەلبژارتیێ ئیراقێ بۆ كێشێن جودا پشكدارن، هەموو یاریزان بەرهەڤن و رژدن بۆ دەستڤە ئینانا رێزێن پێشیێ سەرباری ئەركێ مە ب سانەهی لێ یا دشیان دابیت دێ گەهینە دەستكەڤتان.
