مەزنترین قوتابخانە ل زاخۆ هاتە ڤەكرن
زاخۆ، دلۆڤان هالۆ:
سەلام پیرۆ، رێڤەبەرێ گشتی یێ پەروەردەیا زاخۆ بۆ ڕۆژناما ئەڤرۆ دیار كر كو دەزگەهێ روانگە مەزنترین قوتابخانە ل سەر ئاستێ ئیدارەیا سەربخوە یا زاخۆ بناڤێ ئامادەیا شەهید ئیدریس بارزانی یا كچان نووژەنكر و د ڕێوڕەسمەكێ تایبەت دا هاتە ڤەكرن.
رێڤەبەرێ گشتی یێ پەروەردەیا زاخۆ خویا ژی كر كو پرۆسەیا نووژەنكرنا ڤێ قوتابخانێ پێك هاتبوو ژ چێكرن و گۆهورینا هەموو ئەو پێدڤیێن ڕاستەوخۆ كاریگەری ل سەر ژینگەها خواندنێ و ساخلەمیا قوتابیان هەی و گۆت: «ئەڤ قوتابخانە ل سالا 2011 هاتبوو ئاڤاكرن و هەردو قوتابخانەیێن ئامادەیا شەهید ئیدریس بارزانی یا كچان و قوتابخانەیا لۆشان یا بنەڕەتی یا تێكەل تێدا دەوامێ دكەن، ئەڤ قوتابخانە ژ 30 پۆلێن خواندنێ پێك دهێت و ناڤەندا فێربوونا دو هزار و 322 قوتابیانە، كو دبیتە مەزنترین قوتابخانە ل سەر ئاستێ ئیدارەیا سەربخوە یا زاخۆ».
