مەزنترین نافۆرە ل سەر ئاستێ كوردستانێ و ئیراقێ ل زاخۆ دهێتە دروستكرن
زاخۆ، دلۆڤان هالۆ:
زەهرا سەلیم، سەرپەرشتا پڕۆژەیێ نافۆرا زاخۆ بۆ ڕۆژناما ئەڤرۆ دیاركر كو بۆ ئێكەم جار ل سەر ئاستێ هەرێما كوردستانێ و ئیراقێ ل سەر ڕووبەرێ چار دۆنەمێن ئەردی و ب گوژمێ 13 ملیار دیناران پڕۆژەیێ مەزنترین نافۆرە ل تەنشت ڕووبارێ خابیری ل ئیدارا سەربخوە یا زاخۆ دهێتە دروستكرن، دیسا پاركەكا بن ئەرد ژی بۆ ڕاوەستاندنا تڕۆمبێلان لێ دهێتە دروستكرن.
سەرپەرشتا پڕۆژەیێ نافۆرا زاخۆ، ئاماژە ب وێ چەندێ ژی كر كو ئەڤە ئێكەمین نافۆرەیە ل سەرانسەری كوردستانێ و ئیراقێ ب كوالیتیەكا بلند دهێتە دروستكرن و گۆت: «ئێكەمین نافۆرەیە ئاگر تێدا بهێتە ب كارئینان، بلندبوونا ئاڤا وێ نافۆرێ دگەهیتە 40 مەتران و ئاڤا وێ ب شێوەیێ لڤۆكە ل گەل مۆزیك و ڕۆناهیێ، دیسا دێ شاشەیێن مۆدرێن لێ هێنە دانان».
گۆتژی: «ئەڤ پڕۆژە دێ جوانیەكا زێدەتر دەتە كۆڕنیشێ پرا دەلال و دێ سەرنجا گەشتیارێن ناڤخوە و بیانی بۆ خوە ڕاكێشیت».
