مەزنترین پرۆژێ وەبەرهێنانێ و چاندنێ ل بالندا هاتە چێكرن
ئەڤرۆ
نەوزاد هلوری:
ب مەرەما پێشڤەبرنا كەرتێ چاندنێ و دابینكرنا بەرهەمێ نافخوە و دەلیڤێن كاری، مەزنترین پرۆژێ وەبەرهێنانێ د وارێ چاندنێ دا ل كوزدستانێ ل گوندێ بالندا ل سەر رووبارێ ئاڤا شین هاتە چێكرن كو نێزیكێ 150 كەس تێدا كار دكەن. رێڤەبەرێ چاندنێ ل قەزا مێرگەسوورێ دیار كر، پڕۆژێ ناڤبری ئیك ژ پڕۆژێن هەرە گرنگ و نایابە ل كوردستانێ و دێ خزمەتەكا زۆر باش بۆ كەرتێ چاندنێ و بەرهەمێ خومالی و دابینكرنا دەلیڤێن كاری و زێدەكرنا بەرهەمێ خومالی ل دەڤەرێ هێتەكرن.
ئیسرا عەزیز، كچەكا گوندێ بالنداییە دیار كر، پشتی ئەو ژ كولیژێ دەرچووی، هاتیە پرۆژەی كار بكەت و گۆت: چێكرنا ڤان جۆرە پرۆژان زێدە گرنگیا خوە هەیە، ژبەركۆ دێ سەدان كەس ب تایبەتی دەرچویێن زانكۆ و پەیمانگەهان تێدا كار كەن، لەوا گرنگە كومپانیێن زێدەتر ل كوردستان و دەڤەرێ بهێنە دروستكرن.
ولات تاهر، ئێك ژ كرێكارێن دی یێن پرۆژەییە دبێژیت: نێزیكێ سالەكێ یە ئەز ل پرۆژەی كار دكەم و نوكە پرۆژە ب شێوەیەكی رۆژانە كەفتیە كاری و هەموو جۆرێن سپییاتیان وەكی ماست، شیر، نیڤشك، قەیماغ، پەنیر و چەندین جورێن دی یێن بەرهەمێ سپیاتیان بەرهەم دئینیت، ئەڤ یەك بوویە ئەگەر سەدان گەنج و لاوێن دەڤەرێ ببنە خودان كار، ئەم ل ڤێرە دشێین دەستێ كار یێ خومالی زێدە بكەین ب گۆرەی خواستا بازاڕی.
ئێحسان حەسەن، ئەندازیارێ سەرپەرشتێ پرۆژێ رامی فارم ل گوندێ بالندا، سەبارەت پرۆژەی بۆ ئەڤڕۆ گۆت: دەما سێ سالایە كار د چێكرنا پرۆژەی دهێتەكرن، سوپاس بۆ خودێ نوكە پڕۆژە كەفتیە كاری، ئەڤ پرۆژە ل چەندین قوناغ و پشكان پێكدهێت ژ وانان، قوناغا چاندنا ئینجە و دەخل و دان و گەنمە شاجی كو هەند كومپانی دچینیت، هند ژ خەلكێ دەڤەرێ دكرن ل ڤێرە كوگەهێن هەری مەزن هەنە بۆ هندێ بشێن بەرهەمێ ئالیكێ ئاژەلی ب هەلكرن بۆ دەمێ زڤستانێ یان پێدڤی، قوناغەكا دی هەیە كو ئەو ژی قوناغا خودانكرنا چێلێن هولشتاینە كو هژمارا وان نێزیكێ 750 چیلایە و هەموو ژی شیردەرن، زیدەباری مە چەندین هولێن خودانكرنا مێگامك و گولكا ژی هەیە بۆ سەربرینێ وەكو گوشت، هەر دیسان ل ڤێرە قوناغا بەرهەمئینانێ هەیە كو ئەو ژی ژ گەنمە شامی دهێتە چێكرن، قوناغا دووماهیێ ژی چیكرنا هەموو جورە بەرهەمێن شیرەمەنی یە ب گۆرەی خواستا بازاڕی.
زێدەتر گوت: چێكرنا ڤان كومپانیان كارەكێ هەری گرنگە، بۆ نموونە كومپانیا مە سێ رەهەندی مفا هەیە، مفا بو كومپانیێ هەیە وەكو سەرمایە، دییسان مفا بۆ خەلكی هەیە كو هند تێدا وەكو كرێكار و ئەندازیار و سەرپەرشت تێدا كار بكەن، هند ژی خەلك دێ بەرهەمێ خوە یێ وەكو گەنم و گەنمە شامی فڕۆشیتێ، هەر دیسان مفایەكێ دن هەیە كو ئەو ژی دێ بەرهەمێ خومالی ئێخیتە بازاڕی كۆ هەموو فرێشە بێی كو هیچ مادەییەكێ پاراستنێ یێ كمیایی تێدا بهێتە بكارئینان، ئەڤە زێدەباری كو بەرهەمەكێ ب تام و خوش و ساخلەمە و كوڵێتیا وێ بلندە و بهایێ وێ ژی ل هەمبەر بەرهەمێن دی ئەرزانترە، لەوا زۆر گرنگە پتر پشتەڤانیا ڤان جورە پرۆژان بهێتەكرن، بۆ هندێ زیدەتر خزمەتا كەرتێ چاندنێ بهێتەكرن.
محەمەد مێرگەسووری، رێڤەبەرێ چاندنێ ل قەزا مێرگەسوورێ دیاركر، وان ل نێزیك سەرەدانا پرۆژەی كریە و بۆ ئەڤڕۆ گۆت: پڕۆژێ ناڤبری ئیك ژ پڕۆژێن هەری گرنگ و نایابە ل كوردستانێ و دێ خزمەتەكا زۆر باش بۆ كەرتێ چاندنێ و بەرهەمێ خومالی و دابینكرنا دەلیڤێن كاری و زێدەكرنا بەرهەمێ خومالی ل دەڤەرێ هێتەكرن، ئەڤە زێدەباری د شیاندایە سەدان جوتیارێن دی ل دەڤەرێ بەرهەمێ گەنمە شامی بچنن و بدەنە كومپانیێ.
زێدەتر گوت: ئاستێ كوالێتی و ساخلەمی یێ بەرهەمێ كومپانیێ نایابە و دڤێت خەلك ژی گرنگی ب بەرهەمێن خومال بدەن بۆ هندێ كومپانیێن زێدەتر بهێنە درۆستكرن و ئەو ژی تێدا كار بكەن، كارەكێ گرنگە و جهێ دەستخوشیێ یە كو رۆژانە 15 تەنێن شیری ژ پرۆژەی دهێنە بەرهەمئینان.
