مەزنترین پرۆژەیێ بەرهەمئینانا سپیاتییان دێ ل سێمێلێ هێتە ڤەكرن
ئەمیر ئەترووشی
پرۆژەیەكێ بەرهەمئینانا سپیاتییان ب خەرجییا 60 ملیۆن دۆلاران دێ ل قەزایا سێمێلێ یا پارێزگەها دهۆكێ هێتە ڤەكرن، كو دێ بیتە مەزنترین پرۆژەیێ بەرهەمئینانا سپیاتییان ل سەر ئاستێ هەرێما كوردستانێ و عیراقێ.
فەرمانگەها میدیا و زانیارییان یا حكومەتا هەرێما كوردستانێ ل دۆر وی پرۆژەی راگەهاند، ئێك ژ پلانێن ستراتیجی یێن كابینەیا نەهێ یا حوكمەتا هەریما كوردستانێ گرنگیدان و پێشڤەبرنا زێدەتر یا كەرتێ چاندنێ یە، بۆ ڤێ مەرەمێ ژی ئاسانكاریێن تمام بۆ خۆدانێن پرۆژەیان هاتینە كرن، د وی چارچوڤەی ژی دا دێ پرۆژەیەكێ بەرهەمئینانا سپیاتییان ل قەزا سێمێلێ یا سەر ب پارێزگەها دهۆكێ ڤە ل سەر رووبەرێ هزار دونەمان هێتە دروستكرن و ل دووماهییا ئەڤ سالە دێ تمام بیت.
ل دۆر شیان و ژڤانێ تمامبوون و زانیارییێن زێدەتر ل دۆر پرۆژەی، نەقیب ئەبوبەكر رێڤەبەرێ پرۆژەی دبێژیت: كۆژمێ ڤی پرۆژەی 60 ملیۆن دۆلارن و دوو بۆ سێ هزار چێلێن شیردەر بخۆڤەگریت، كو دشێن رۆژانە 120 تەنێن شیری بەرهەم ئینن و ماست، ئاڤا ماست، پەنیر و شیر و تامێن جۆدا ژێ هێنە بەرهەمئینان.
فەرمانگەها میدیا و زانیارییان بەحس ل هندێ كر، نوكە پرۆژە 80%ێ تمامبوویە و ل دووماهییا ئەڤ سالە دێ تمام بیت و بیتە مەزنترین پرۆژەیێ بەرهەمئینانا سپیاتییان ل هەرێما كورستانێ و عیراقێ.
ژلایێ خۆڤە خۆدانێ پرۆژەی ئاماژە ب هندێ دا كابینەیا نەهێ یا حكومەتا هەرێما كوردستانێ ژلایێ دابینكرنا زەڤی، كارەب، ئاڤ و پێدڤییێن دووڤە، هەموو ئاسانكاری بۆ بجهگەهاندنا پرۆژەی كرینە.
