مەزنترین پڕۆژێ سەرژێگەھا مریشکان ل دھۆکێ ھاتە دانان

ئه‌ڤرۆ نيوز:
رێڤەبەرێ راگەھاندنا پارێزگەھا دھۆکێ دیار کر کو ئێکەمین پڕۆژێ سەرژێگەھا مریشکان ل دووڤ ستانداردێن جیھانێ دوھی رۆژا 21ى شوباتا 2017ێ ب پشتەڤانیا کەرتێ تایبەت ل دھۆکێ ھاتە دانان و گۆت: “ئەڤ سەرژێگەھە دێ د دەمژمێرەکێ دا چار ھزار و 500 مریشکان بۆ بازاری بەرھەڤ کەت”.
مسلح عەبدولقادر، رێڤەبەرێ راگەھاندنا پارێزگەھا دھۆکێ بۆ رۆژناما ئەڤرۆ ئاشکرا کر کو ئەڤ پرۆژە دێ ل دەڤەرا بالقوس یا سەر ب قەزا سێمێلێ ڤە ھێتە دانان و گۆت: “دوھی بەرێ بنیاتی بۆ ڤی پرۆژەیی ھاتە دانان و ل سالا بھێت دێ بەرھەمێ ڤێ سەرژێگەھێ کەڤیتە بازاری و دێ د دەمژمێرەکێ دا چار ھزار و 500 مریشکان سەرژێ کەت و ئەڤ پرۆژە دێ بیتە ئەگەرێ وێ چەندێ کو مریشکا خۆمالی پتر بھێتە بەرھەمئینان و فرۆتن”.
ناڤھاتی ئاماژە دا وێ چەندێ کو نێزیکی پێنج ملیۆن دۆلاران بۆ دروستکرنا پرۆژێ سەرژێگەھا مریشکان دگەل دروستکرنا پرۆژێ ب خۆدانکرنا مریشکان ھاتینە تەرخانکرن و گۆت: “ئەڤە ئێکەمین پرۆژێ مریشکانە ب شێوەکێ مەزن دھێتە دروستکرن”.

کۆمێنتا تە