مەسرور بارزانی ل ڕۆژا جیهانی یا زمانێ دایك:چەند بڕیارێن گرنگ بۆ پاراستنا زمانێ كوردی دێ دەركەین

ئەڤرۆ

سەرۆكێ حوكمەتا هەرێما كوردستانێ، مەسرور بارزانی ل ب هەلكەفتا ڕۆژا جیهانی یا زمانێ دایك ڕاگەهاند، بلا زمانێ كوردی ل پێگە و سۆشیال میدیایێ دا زێدەتر بكاربینین. دێ ژ خوە دەستپێكەم و دێ ژ ئەڤرۆ و وێڤە زێدەتر ب كوردی تویتان بەلاڤكەم.
ل ڕۆژا سێشەمبی 21/2/2023 كو هەڤدەم ڕۆژا جیهانی یا زمانێ دایك یە، مەسرور بارزانی، سەرۆكێ حوكمەتا هەرێما كوردستانێ ل پێگەهێ خوە یێ تایبەت ل سەر تۆرا جڤاكی یا تویتەری بەلاڤكر» ڕۆژا زمانێ دایك، ل هەموو كوردستانیان و نەتەوە و پێكهاتەییێن كوردستانێ پیرۆز دكەم، پاراستن و گەشەپێدانا زمانێ دایك، ئەركێ مە هەموویانە».
د پشكەكا دی یا تویتا خوە دا، مەسرور بارزانی ئاماژە ب وێ چەندێ كر» بلا زمانێ كوردی ل پێگە و سوشیال میدیایێ دا زێدەتر بكاربینین و دێ ژ خوە دەستپێكەم و ژ ئەڤرۆ دێ زێدەتر ب كوردی تویتان بەلاڤكەم».
سەرۆكێ حوكمەتا هەرێما كوردستانێ گوت ژی» چەند بڕیارێن گرنگ بۆ پاراستنا زمانێ كوردی دێ دەركەین».
هەر د ڕۆژا جیهانی یا زمانێ دایك دا، سەرۆكێ حوكمەتا هەرێما كوردستانێ دو فەرمانێن تایبەت ل دۆر گرنگیدانێ ب زمانێ كوردی دەركرن.
فەرمانا ئێكێ:
ژ پێخەمەت گرنگیدان ب زمانێ كوردی وەكو زمانێ دایك، مە بڕیار دا:
ڕاسپاردنا وەزارەتاخواندنا بلند و ڤەكۆلینێن زانستی و وەزارەتا پەروەردێ ب هەماهەنگی ل گەل ئەكادیمیا كوردی و شارەزا و پسپۆرێن ڤی بواری، ب بەرهەڤكرنا پرۆگرامەكێ گونجای یێ فێربوونا زمانێ كوردی بۆ وان وەلاتیێن بیانی یێن ب مەبەستا كاركرنێ ل هەرێما كوردستانێ د ئاكنجی.
فەرمانا دویێ:
بۆ هەموو وەزارەتان
بابەت/ گرنگیدان ب زمانێ كوردی
پشت بەستن ب قانوونا زمانێن فەرمی ل هەرێما كوردستانێ/ ئیراق هەژمار (6) یا سالا 2014، ژ پێخەمەت پاراستنا زمانێ كوردی وەكو زمانێ سەرەكی ل هەرێما كوردستانێ، كارێ پیچدڤی ئەنجام بدەن بۆ نڤیسینا تابلۆیان ب زمانێ كوردی ل هەموو دەزگەه و فەرمانگەهێن حكومی و نە حكومی و نڤیسینگەه و نوونەرایەتی و قونسۆلیێن وەلاتان و ڕێكخراوێن بیانی و كۆمپانی و دەزگەهێن كەرتێ تایبەت، ب گۆرەی حوكمێن قانوونا ئاماژە پێكری ل سەری.
هەروەسا ل ئۆتێل و جهێن گەشتیاری و ڕێستورانتان، پێدڤیە گرنگی ب زمانێ كوردی بهێتە دان و لیستا خوارنێ و ڕێبەر و ڕێنمایی، ب زمانێ كوردی ژی هەبیت.

کۆمێنتا تە