مەسرور بارزانی پشتەڤانییا یانەیا نەورۆز كر
پشتی بۆ ماوەیێ چەند مەهەكە یانەیا نەورۆز یا باژێرێ سلێمانیێ تووشی ئاریشەیێن دارایی بوون و گەڤ ل سەر خوەڤەكێشانا تیما وان یا فوتبۆلێ د خولا ستێرێن ئیراقێ دا هابووین، مەسرۆر بارزانی سەرۆكێ حوكمەتا هەرێما كوردستانێ ل ڕێكا نڤێسینگەها خوە هاتە سەر هێل ب كۆژمەیێ 450 ملیۆن دیناران پشتەڤانییا ڤێ یانەیێ كر.
پێشتری دو حەفتییان مەسرۆر بارزانی د دیدارەكا رۆژنامەڤانی دا ڕاگەهاند بوو ئەو ناهێلین هیچ یانەیەكا كوردستانی د خولا ستێرێن ئیراقێ دا داكەڤیت و دێ پشتەڤانییا هەرچار یانەیێن پشكدار د خولێ دا كەت ئەو ژی، دهۆك، زاخۆ، هەولێر و نەورۆز و دیاركر بوو دێ بەردەوامبیت ل سەر پشتەڤانییا وەرزشا كوردستانێ ب گشتی و یانەیێن پشكداریێ د خول و قارەمانیێن دەرڤە ژی دا بكەن.
بەرپرسێن وەرزشی ل یانەیا نەورۆز كەیفخوەشیا خوە دیاركرینە و سۆپاسییا سەرۆكێ حوكمەتا هەرێما كوردستانێ كر كو ئەو ژ ئاریشەیەكا مەزن قورتالكرینە و ئەڤە ژی بوویە ئەگەر كو تیما وان یا فوتبۆلێ د خولا ستێرێن ئیراقێ دا بەردەوامیێ بدەنە هەڤڕكیێ د خولێ دا وەكو ئێك ژ یانەیێن كوردستانی.
بۆ زانین یانەیا نەورۆز ژ پارێزگەها سلێمانیێ یە، بۆ ماوەیێ 60 رۆژە ژبەر نەبوونا پارەیێ بەردەست و كەڤتینە د قەیرانا دارایی دا نەشیاینە مووچەیێ یاریزان و كادرێ ڕاهێنانێن تیما خوە دابینبكەن.
هەژی گۆتنێ یە سەرۆكێ حوكمەتا هەرێما كوردستانێ پێشتر پشتەڤانییا هەر ئێك ژ یانەیێن دهۆك، زاخۆ و هەولێر كرییە، دیسان ل دووڤ بەرنامەكێ سالانە وەكو ڕێزگرتن ئەو تیم و یاریزانێن ناسناڤان و دەستكەڤتان، ل سەر ئاستێ كوردستانێ، ئیراقێ و دەرڤە دینن دهێنە خەلاتكرن.
