مەسرۆر بارزانی:ریفراندۆم نە بۆ دەستکاریکرنا سنۆرێن وەلاتێن جیرانە
ئەڤرۆ نیۆز،زنار تۆڤی:
راوێژکارێ ئەنجومەنێ ئاسایشا ھەرێما کوردستانێ رادگەهینیت کو ریفراندۆما سەربەخۆیا کوردستانێ بۆ دەستکاریکرنا سنۆرێن وەلاتێن جیران یێن باشۆرێ کوردستانێ نینە،لێ بتنی دێ سنۆرێ دناڤبەرا کوردستانێ و عێراقێ دا هێتە چەسپاندن.
مەسرۆر بارزانی ڕاوێژکارێ ئەنجومەنێ ئاسایشا ھەرێما کوردستانێ بۆ ڕۆژناما (The Guardian) یا بریتانی راگەهاندیە،کو پێدڤی ناکەت تورکیا سەبارەت ب ریفراندۆما سەربەخۆیا کوردستانێ نیگەران بیت، چونکی ریفراندۆم ”دێ بۆ دارێژتنا پەیوەندیێن دو لایەنی یێن دناڤبەرا ھەولێر و بەغدا دا بیت.
د درێژاهیا گۆتنێن خوەدا مەسرۆر بارزانی جەخت ل هندێ کریە کو ھەرێما کوردستانێ ئنیەتا دەستکاریکرنا سنۆرێن وەلاتێن جیران دا نینە،لێ ریفراندۆم بۆ چەسپاندنا وی سنۆرەیە،کو پێشوەخت دناڤبەرا کوردستانێ و دەڤەرێن دیتر یێن عێراقێ دا هاتیە دارێژتن.
راوێژکارێ ئەنجومەنێ ئاسایشا هەرێما کوردستانێ ھەروەسا دبێژیت،”ئەو دەم هاتیە کو بهێتە قەبوولکرن،کو مۆدێلا پێکڤە ژیانێ ل عێراقێ کار ناکەت،هەروەسا عێراق ب کرداری یا دابەشبووی و دەنگدان ل ریفراندۆمێ بتنی دێ ڤی دوورهێلی نیشان دەت، کو پێشوەخت رووی دایە“.
