مەسرۆر بارزانی ڕازیبوون ل سەر دروستكرنا یاریگەهەكا فوتبۆلێ دا
شاهۆ فەرید:
د داخویانیەكێ دا ئەیهەم جامی سەرۆكێ یانەیا باتیفا بۆ رۆژنامەیا ئەڤرۆ دیاركر ب خوەشحالی ڤە ل سەر ڕاسپاردا جەنابێ مەسرۆر بارزانی سەرۆكێ حوكمەتا هەرێما كوردستانێ یانەیا مە و هەموو گەنجێن باژێرێ باتیفا دێ ب یاریگەهەكا فوتبۆلێ شادبن و ئەڤە ژی جوانترین مزگینی و دیارییە بۆ وەرزشڤانێن باتیفا هاتییە دان.
زێدەتر ناڤهاتی گۆت: ئەڤە دەمەكێ درێژە ئەم پێدڤی ب یاریگەهەكا مۆدرێن یا فوتبۆلێ نە، پشتی مە داخواز ژ بەرێز گۆهدار شێخۆی سەرپەرشتێ ئیدارا زاخۆ ب ڕێیا قائیمقامێ قەزا باتیفا، سەرۆكێ حوكمەتێ مەسرۆر بارزانی ڕازیبوو ل سەر دروستكرنا یاریگەهەكا فوتبۆلێ و پشتەڤانییا خوە دیاركر، ئەڤە ژی جوانترین مزگینیە بۆ وەرزشڤانێن دەڤرا مە، سۆپاسییا سەرۆكێ حوكمەتێ دكەین و رۆلێ مەزن یێ سەرپەرشتێ ئیدارا زاخۆ و قائمقمامێ باتیفا ب پیرۆزی قەلەم ددەین، پێنەڤێت ئەڤە ژی ل دووڤ ئەوێ پلانا ڕێكخستی یا ژلایێ حوكمەتا هەرێمێ بۆ پێشئێخستنا كەرتێ وەرزشێ یە.
هەروەسان گۆت ژی: ئەڤ یاریگەهە دێ ڕێكخوەشكەربیت بۆ پێشكەفتنا وەرزشا باتیفا بشێن یاریزانان بەرهەم بینین، هەر خولەك و قارەمانیەكا پشكداریێ تێدا بكەین ناڤا ئەرد و جەماوەرێ خوەدا یاریێ بكەین، دێ جهێ مفایی بیت بۆ تیمێن مللێ یێن دەڤەرێ ئەو ژی یارییان بكەن
ئەیهەم جامی گۆت: پشتی بڕیار بوویە فەرمی جهێن پەیوەندیدار تا سێ ئەردێن جودا دەستنیشان كرینە ژبۆ ژێگرتنا جهەكێ گونجایی پێنەڤێت دێ ل نێزیكی باتیفا، دیزاینەكێ جوان بۆ یاریگەهێ هاتیە بەرهەڤكرن، لێ دیار نینە دێ جهێ چەند پشتەڤانان ناڤدا هەبیت، سەبارەتی خولێ ژی هێشتا گەلەك دەم ماییە دێ بەرهەڤیێن باش و جێوازتربن تایبەت پشتی ڤێ بڕیارا دیرۆكی.
هەروەسان ناڤهاتی گۆت: ئەم سۆپاسییا ڕێڤەبەرییا وەرزش و لاوان و بنگەهێ لاوان ل باتیفا دكەین كو ئەڤە چەندین سالە یاریگەها خوە پێشكێشی مە كرییە بۆ ئەنجامدانا یارییان، ب هیڤییا وێ یەكێ زووترین دەم یاریگەها مە بهێتە دروستكرن، ئێدی ب شێن زێدەتر خزمەتا وەرزشڤانێن باژێرێ خوە بكەین و پتر وەرزشێ بەر ب پێشڤە ببەین، دوبارە سۆپاسییا سەرۆكێ حوكمەتا هەرێما كوردستانێ دكەین بۆ ڤێ دیاریێ كو بێ جوداهی و هەموو شیانێن خوە پشتەڤانییا وەرزش و وەرزشڤانان دكەت.
