مەسعود پەرەخی: دێ تیما خوە یا خولا کوردستانێ بەرهەڤکەین
عەلی حاجی:
د داخویانیەکێ دا جێگرێ سەرۆکێ یانەیا زاخۆ یا وەرزشی بۆ رۆژنامەیا ئەڤرۆ دیار کر وان دەست ب بەرهەڤیان کریە بۆ تیما وان یا پشکدار د خولا هەرێما کوردستانێ یا تەپاپێی و وان تیمەکا باش دڤێت.
زێدەتر مەسعود پەرەخی گۆت: بۆ دەما چەند رۆژەکایە د بن سەرپەرشتیا ڕاهێنەرێ مە یێ وەرزێ بوری بەناف ئەحمەدی تیما مە یا پشکدار د خولا نایابا کوردستانێ خوە ئاڤا دکەت بۆ وەرزێ نوویێ خولێ،هەر چەندە هەتا نوکە مە دانوستاندن دگەل چو یاریزانێن خوە یێن وەرزێ بوری ژی نەکریە لێ د دەمەک نێزیک دا ئەو دێ دەست ب دانوستاندنان کەن بۆ وەرزێ نوو، هندەک یاریزان ل بەر دەستێ ڕاهێنەرێ مە بەناف ئەحمەدی هەنە و ژ نێزیک ڤە چاڤدێریا وان دکەت ئەو یاریزانێ خودان شیان بیت دێ دگەل تیما مە دا مینیت و قوناغا دویێ ژی دا دێ دانوستاندنێ دگەل وان یاریزانان کەین یێن مە پێدڤی ب شیانێن وان هەین، بێگومان وەرزێ بوری تیما مە شیابوو ئاستەکێ باش پێشکێش بکەت و ئێک ژ تیمێن بەربژار بوو بۆ برنا ناسناڤی.
ناڤبری گۆت ژی: کادرێ مە یێ ڕاهێنەران دێ وەکو خوە مینیت و بۆ وەرزێ نوو ژی دێ دگەل دا مە بن و مە باوەرییەکا مەزن ب شیانێن وان هەنە و پشت ڕاستین دێ شێن کارەکێ باش بۆ ڤێ یانەیێ کەن.
