مەكتەبا ریكخستنێ 127 سالیا رۆژنامەڤانیا كوردی پیرۆز دكەت
مەكتەبا رێكخستنا پارتی ل پارێزگەها دهۆكێ ب هـەلكەفتنا بۆرینا 127 سالان ل سەر رۆژا رۆژنامەگەریا كوردی پەیامەكا پیرۆزباهیێ بەلاڤكر و تێدا هاتیە: بناڤێ مەكتەبا ریكخستنا پارێزگەهـا دهـۆكێ گەرمترین پیرۆزباهیان ئاراستەی تەڤاهیا رۆژنامەڤانێن كورد دكەین، ل هەر جهێ د كەد و خەباتێ دابن بۆ خزمەتكرنا گەل و وەلاتێ خۆ.
دیسا د پەیاما پیرۆزباهیا مەكتەبا رێكخستنێ دا هاتیە: «ب ڤێ هەلكەفتا شكودارد رێز و روومەتێن خۆ ئاراستەی خەبات و بەرخودانا میرێ رۆژنامەڤانێن كورد (میقداد مەدحەت بەدرخان) دكەین، كو بنیاتێ پەیڤا رۆژنامەڤانیا كوردی دانا و ئێكەم رۆژنامەیا كوردی بناڤێ (كوردستان) دەرئێخستی و ئەڤرۆ ئەم هەمی شانازیێ ب وێ پێڤاژوویا مەزنا رۆژنامەڤانیا گەلێ خۆ دكەین».
مەكتەبا رێكخستنێ د پەیاما خۆ یا پیرۆزباهیێ دا ئاشكرا ژی كریە كو رۆژنامەڤانی ئێك ژ گرنگترین ستوونێن شارستانیا هەڤچەرخە، لەوما پشتەڤانیا خۆ بۆ رۆژنامەڤانێن كوردستانێ ب گشتی و یێن سنۆرێ پارێزگەهـا دهـۆكێ و ئیدارا سەربخۆ یا زاخۆ ب تایبەت دووپات دكەین، هیڤیدارین بەردەوام بن ل خزمەتا خۆیا پیرۆز و پرسێن نەتەوەیی و نیشتیمانی ل بەراهـیا كار و بەرنامەیێ وانا بن و بۆ سەرخستنا دۆزا رەوایا كورد و كوردستانێ درێغیێ نەكەن.
