مەكتەبا رێكخستنا پارتی ل دهۆكێ: ئەم هەمی هاریكار و پشتەڤانێن خودان پێدڤیێن تایبەتین
هاریكارێ بەرپرسێ مەكتەبا رێكخستنا پارتی ل پارێزگەها دهـۆكێ دوهی 3/12/2023 ب نوونەراتیا مەكتەبا رێكخستنێ سەرەدانا رێڤەبەریا چاڤدێریا كێم ئەندامان ل دهوكێ كر ب مەرەما رۆژا جیهـانیا خودان پێدڤیێن تایبەت و پشكداری د چەندین چالاكیان دا كر، كو رێڤەبەریا ناڤبری ب ڤێ هەلكەفتێ ساز كربوون.
سەباح بەیتوللا، هاریكارێ بەرپرسێ مەكتەبا رێكخستنا پارتی ل پارێزگەها دهـۆكێ د پەیڤەكێ دا رۆژا جیهـانیا خودان پێدڤیێن تایبەت ل هەمی خودان پێدڤیێن تایبەت ل پارێزگەها دهۆكێ پیرۆز كر و دەستخۆشی ل رێڤەبەریا چاڤدێریا كێمئەندامان و مالباتێن وانا كر بۆ وێ سەرەدەریا دروست ل گەل مرۆڤێن خودان پێدڤیێن تایبەت دا دكەن و گۆت: «پێدڤیە ئەم هەمی هاریكار و پشتەڤانێن خودان پێدڤیێن تایبەت بین، داكو بگەهینە وان ئارمانج و هیڤیێن د دلێ وان دا، هیڤیا سەركەفتنێ و لەشساخیێ و ژیانەكا بەختەوەر بۆ دخوازین».
دیسا هەر ب هەلكەفتا رۆژا جیهـانیا خودان پێدڤیێن تایبەت ل سەرانسەری پارێزگارێ دهۆكێ چەندین چالاكیێن جودا هاتنە ئەنجامدان.
ل ئامێدیێ ژی ب هەلكەفتا رۆژا جیهانیا خودان پێدڤیێن تایبەت چەندین چالاكی هاتنە ئانجام دان و دەزگەهێ خێرخوازیێ بارزانی د رێورەسمەكی دا هەژمارەكا قۆتابیێن خودان پێدڤیێن تایبەت یێن قوتابخانا زاب ل دێرەلۆكێ خەلاتكرن و رێڤەبەریا چاڤدێریا جڤاكی ل شێلادزێ ژی چەند چالاكی ئەنجامدان و دیاری ل سەر 35 قوتابیێن خودان پێدڤیێن تایبەت دا بەلاڤكرن.
