مەكتەبا رێكخستنێ پەیامەك ب هەلكەفتا سەرهەلدانا دەڤەرا بەهـدینان بەلاڤكر
مەكتەبا رێكخستنا پارتی ل پارێزگەها دهۆكێ ب هەلكەفتا 34 سالڤەگەڕا بیرەوەریا سەرهلدانا دەڤەرا بەهدینان یا بهارا سالا 1991 پەیامەكا پیرۆزباهیێ بەلاڤكر و تیچدا هاتیە: ب هەلكەفتا 34 سالڤەگەڕا بیرەوەریا سەرهلدانا دەڤەرا بەهدینان گەرمترین پیرۆزباهیان ئاراستەی تەڤایا خەلكێ خۆشتڤیێ بەهدینان ب گشتی و مالباتێن شەهیدان و پێشمەرگەهێن قەهرەمان ب تایبەت دكەین.
دیسا د پەیاما مەكتەبا رێكخستنێ دا هاتیە: «34 سالان بەری نهـا ل رۆژا 12ی ئادارا 1991ێ خەلكێ شەرەفمەند و خۆڕاگڕێ دەڤەرا بەهدینانان ب هەمی تەخ و چینێن خۆڤە و ب هەڤكاری ل گەل هێزێن پێشمەرگەهێن كوردستانێ هێرش برنە سەر دام و دەزگەهێن رژێما بەعسا گۆر ب گۆر و گۆتە وان ئەڤە ئاخا مەیە و ئێدی هەوە ناحەوینیت».
ئاشكرا ژی كریە كو سەرهەلدانا دەڤەرا بەهـدینان ل باژێڕێن (ئاكڕێ و بەردەڕەشێ) دەسپێكر، هەروەسا شێخان و دهۆك و ئامێدی و سێمێل و زاخۆ و باتیفا و هەمی باژێڕ و باژێڕۆكێن دی یێن دەڤەرێ ڤەگرت، ئەنجام دا دەڤەرا بەهـدینان هەمی ژ سیخۆر و دووڤەلانكێن رژێمێ هاتە پاقژكرن و مزگینیا سەركەفتنا سەرهلدانا گەلێ كوردستانێ گەهاندە هەمی دەڤەرێن دی یێن كوردستانێ و تولا ئەنفال و كیمیاباران و شەرێ كومكوژیێ و سیاسەتا عەرد سۆتنێ هاتە ڤەكرن.
د دووماهیا پەیاما مەكتەبا رێكخستنا پارتی ل دپارێزگەها دهۆكێ دا هاتیە: «سەرێ رێزێ بۆ گیانێ پاقژێ شەهیدێن سەرهلدانێ و تەڤایا شەهیدێن رێكا رزگاریخوازیا كوردستانێ و ل سەر كاروانێ شەهیدان بارزانیێ نەمر و كاك ئدریسێ هەردەم ساخ دچەمینین».
