مەكتەبا ڕێكخستنێ: هەلەبجە دەنگێ وژدانا بریندار و قیژیا بـێ گونەهیا گەلـێ كـوردە
مەكتەبا رێكخستنا پارتی ل پارێزگەها دهۆكێ ب هەبكەفتا 33 سالیا كیمیا بارانكرنا هەلەبجە پەیامەك بەلاڤكریە و تێدا هاتیە: «33 سال ل سەر كارەساتا دلتەزینا كیمیابارانا باژێڕێ حەلەبجەیا شەهید دەرباز دبن، ئەڤ تاوانا هوڤانە یا كو ژ لایێ ڕژێما بەعسا ژناڤچووی ڤە ل 16ێ ئادارا 1988ێ هاتیە ئەنجامدان، پشكەك بوو ژ زنجیرەیەكا تاوانێن مەزن و ب ئێك ژ دڕەندەترین تاوانێن دیرۆكا مرۆڤایەتیێ یا هەڤچەرخ دهێتە هەژمارتن، كارەساتا حەلەبجە لاپەرەكێ ڕەشە د مێژوویا ڕژێما بەعسا دكتاتۆر دا و شەرمەزاریەكا مەزنە بۆ جڤاكێ نیڤدەولەتی، كو ل سەر ڤێ تاوانێ بێدەنگ مای».
دیسا د پەیاما مەكتەبا رێكخستنا پارتی دا هاتیە: «حەلەبجە دەنگێ وژدانا بریندار و قیژیا بێ گوننەهیا گەلێ كوردە، وێنە و دیمەنێن وێ كارەساتا مرۆڤی، دێ هەتا هەتایێ مینا شاهدەكێ زیندی، ل سەر ستەم و زۆرداریا ڕژێما بەعس د بیردانك و د ناڤ لاپەڕێن دیرۆكا گەلێ مە و هەمی مرۆڤایەتیێ دا مینیت».
مەكتەبا رێكخستنێ د پەیاما خۆ دا گۆتیە: «ئەم وەكو مەكتەبا ڕێكخستنا پارتی ل پارێزگەها دهۆكێ، ب دلەكێ پڕ ئازار، قوربانیدانێن گەلێ خۆ یێن ڤێ چاما مەزن ب ڕێز و شانازیڤە ب بیر دئینین و دوپات دكەینەڤە، كو خوینا وان یا پیرۆز، وەكو مەشخەلەكێ هەردەم هەل، دێ ڕێكا ئازادی و كەرامەتێ بۆ مللەتێ مە ڕۆهنكەت».
هەروەیا د پەیامێ دا هاتیە: «داخوازێ ژ حكومەتا ئیراقا فدرال دكەین، ب بەرپرسیاریەتیا خۆ یا یاسایی، ئەخلاقی و مێژوویی، بەرامبەر قوربانیێن ڤێ تاوانا هۆڤانە ڕابیت و كەسوكارێن شەهیدان و برینداران قەرەبوو بكەت».
