مەلایەک: ئەو ھەڤژینێن ب بھانا رۆژیێ پشتا خوە ددەنە ئێکدو گۆنەھکارن
ئه‌ڤرۆ نيوز:
گەلەک ھەڤژین د ھەیڤا رەمەزانێ دا پشتا خوە ددەنە ئێکدو و دبێژن: گۆنەھە ئەم قەستا نڤینا ئێکدو بکەین و حەرامە و ئەم د گۆنەھکارین، ئەڤ چەندە دبیتە سەدەما ھندێ کو جاران ھەڤژین ب شەرەدەڤ بچن د ڤی دەرباری دا مەلایەک دبێژیت: ئەو ھەڤژینێن ب بھانا رۆژیێ پشتا خوە ددەنە ئێک گۆنەھکارن و خودێ بو وان یا درۆست کری د شەڤێ دا ئەو بچنە نڤینا ئێکدو.
ح، م: ژنەکە د ڤێ ده‌ربارێ دا گۆت: ئەڤە چەند سالە ل گەل دبیتە ھەیڤا رەمەزانێ ئەز و زەلامێ من ھەر ئێک ژ مە د ژورەکێ ڤە دنڤیت، ھەتا ئەم زوو نێزیکی نڤینا ئێکدو نابین و د ھەیڤا رەمەزانێ دا جاران بتنێ جارەکێ ئەم دچینە نڤینا ئێکدو، بەلێ ل گەل ھندێ ژی ئەم شەرا دکەین و ئاریشە و ناکوکی دناڤبەرا مەدا پەیدا دبن، چونکی ئەم ژ گەلەک ئالیان ڤە جودا دبین.
خۆيا كر ژى كو ئەو گەلەک جارا ژ ھەڤژینێ خوە دخوازیت ئەو پێکڤە بنڤن، بەلێ ھەڤژینێ وێ دبێژتێ گۆنەھە و خۆدێ دێ بو مە ب گۆنەە ھژمێریت و گۆت: لەورا ھەتا ھەیڤا رەمەزانێ ب دووماھی دھێت ئەم یێن ل بن فشارەکا دەروونی ڤە، ھەڤژینێ من ژی یێ رازی نینە، لێ گەلەک دبێژن یا درۆست نینە ھوون چ رەفتارا بکەن ژبەرکو رۆژی پێ لاواز دبیت و چ خێرا تێدا نامینیت.
ژ لایەکێ دیڤە ژی س:ع: زەلامە و بەحسێ کێشا خوە ل گەل ھەڤژینا خوە کر و گۆت: من گەلەک دڤێت ئەز ھەر شەڤ نێزیکی ھەڤژینا خوە ببم، لێ چەند جارا من داخواز ژ ھەڤژینا خوە کریە دبێژیت حەرامە و خۆدێ رازی نابیت ئەز رەفتارەکا وەسا بکەم و دێ ل شووونا باشیێ بو من بیتە گۆنەھەکا مەزن و دترسم رەمەزانا من لاواز بیت.
ڤێ ژنێ گۆتژی: ئەڤە ژ سەرێ رەمەزانێ وەرە ئەم ب درۆستی ئێکدو ھەمبێز ژی ناکەین.
د دەربارێ بابەتی دا مەلا دلشاد تاھر بێسفکی دیار کر کو، ئەڤە بوویە دیاردە و ھەردەما دبیتە ھەیڤا رەمەزانێ ھەڤژین نڤینا خوە ژ ئێکدو جودا دکەن و نێزیکی ئێک نابن، بەلێ ئەڤە رەفتارەکا شاشە و چ گۆنەە تێدا نینە گەر ژێک جودا ژی نەکەن، چونکی خودایێ مەزن دبێژیت: (أُحِلَّ لَكُمْ لَيْلَةَ الصِّيَامِ الرَّفَثُ إِلَىٰ نِسَائِكُمْ ۚ هُنَّ لِبَاسٌ لَكُمْ وَأَنْتُمْ لِبَاسٌ لَهُنَّ ۗ عَلِمَ اللَّهُ أَنَّكُمْ كُنْتُمْتَخْتَانُونَ أَنْفُسَكُمْ فَتَابَ عَلَيْكُمْ وَعَفَا عَنْكُمْ ۖ فَالْآنَ بَاشِرُوهُنَّ وَابْتَغُوا مَا كَتَبَ اللَّهُ لَكُمْ ۚ وَكُلُواوَاشْرَبُوا حَتَّىٰ يَتَبَيَّنَ لَكُمُ الْخَيْطُ الْأَبْيَضُ مِنَ الْخَيْطِ الْأَسْوَدِ مِنَ الْفَجْرِ ۖ ثُمَّ أَتِمُّوا الصِّيَامَ إِلَى اللَّيْلِ ۚ وَلَاتُبَاشِرُوهُنَّ وَأَنْتُمْ عَاكِفُونَ فِي الْمَسَاجِدِ ۗ تِلْكَ حُدُودُ اللَّهِ فَلَا تَقْرَبُوهَا ۗ كَذَٰلِكَ يُبَيِّنُ اللَّهُ آيَاتِهِ لِلنَّاسِ لَعَلَّهُمْ يَتَّقُونَ) سورة البقرة ﴿١٨٧﴾. ئانکو خودێ بو ھەوە درۆست کریە کو ھوون رەمەزانێ ل شەڤێ بچنە نڤینا خوە و ژنێن ھەوە ستارەنە بو ھەوە و ھوون بو وان ستارەنە، خودێ زانیە کو ھوون خیانەتێ ل خوە دکەن، ب چوونا نڤینا خوە پشتی عەیشا ل شەڤێن رەمەزانێ کو ئەڤە ل دەستپێکێ تشتەکێ حەرام بوو، ئینا وی توبە دانا سەر ھەوە و بەرفرەھی بو ھەوە ئێخستە مەسەلێ، ڤێجا ھوون ژ نوکە وێڤە ھەرنە نڤینا خوە، وی تشتێ خودێ بو ھەوە حەز کری ژ زارویان بخوازن، ھەتا د ڤێ ئایەتا قورانا پیروز دا خودێ بومە یا دیار کری کو درۆستە چوونا نڤینا خوە ل دەمێ رۆژ ئاڤابوونێ، ئانکو ژ بانگێ مەغرەب تا دەمێ فەجرێ ئانکو بانگێ سپێدێ.
مەلای ئاماژە بڤێ چەندێ ژی کر کو، ل دەستپێکا ئیسلامێ و دەمێ رۆژا رەمەزانێ بویە ئەرک ل سەر موسلمانا ھەر کەسێ شەڤێ نڤست و پشتی ھشیار ببا بو وی نەدبو بچیتە نڤینا خوە و نەدبو خوارن و ڤەخوارنا بخووت، بلا بەری بانگێ سپێدێ ژی با و گۆت: پاشی خودایێ مەزن ئەو حوکمە راکر و کرە تشتەکێ درۆست بو موسلمانا کو د ماوێ شەڤێ ھەموویێ دا درۆست کر، بتنێ رۆژێ ئەڤ کریارا ھە نابیت و رۆژی پێ دکەڤیت و حوکمێ خوە یێ تایبەت ھەیە بو وی کەسێ ب رۆژی و ب رۆژێ بچیتە نڤینا خوە.
ماموستایێ ئایینی ئەو چەندە ژی گۆت: ژبەر ڤێ چەندێ ئەو زەلام یان ئەو ئافرەتا خوە دوور کەت ژ ڤێ چەندێ ب بھانەیا کو نابیت و ھزر بکەن گۆنەھە و رەمەزانە، نە یا دروستە ئەڤ چەندە و نابیت خوە ژ ئێکدو دوور کەن بەروڤاژی ژ وێ چەندێ دێ گۆنەھکار بن دەمێ ئێکدو بێ بەھر دکەن یان پشتا خوە ددەنە ئێکدو.
