مەها بهێت ئازۆقەیێ وان كەسان دێ هێتە راگرتن یێن فۆرما ئەلكترۆنی نەبیت
هەولێر، قائید میرۆ:
رێڤەبەرێ گشتیێ بازرگانی ئاشكرا كر، دوماهیا ڤێ مەهێ، دوماهی ژڤانە بۆ پڕكرنا فۆرما ئەلكترۆنی و دبێژیت: مەها بهێت ئەرزاقێ وان كەسان دێ هێتە راگرتن، یێن فۆرما ئەلكترۆنی پڕ نەكربیت.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیاركر، پرۆسەیا فۆرمێن ئەلكترۆنی ب شێوەیەكێ سەركەفتی بڕێڤە دچیت و پێدڤیە وەلاتی لەزێ بكەن، هەتا دەستپێكا مەها تەباخێ هەموو وەلاتی ناڤێن خۆ تۆمار بكەن، بەروڤاژی ڤێجارێ دەمێ پڕكرنا فۆرمێن ئەلكترۆنی ناهێتە درێژكرن و رێكار دێ هێنە گوهۆڕین و گۆت: «هەر كەسەكێ هەتا دوماهیا ڤێ مەهێ خۆ تۆمار نەكەت، ژ مەها بهێت و پێڤە پشكا وی یا ئەرزاقێ مەها دێ هێتە راگرتن».
نەوزاد شێخ كامل گۆتژی: «بلندترین رێژەیا تۆماركرنێ ل پارێزگەها هەلەبجە هاتیە تۆماركرن و هەتا نوكە 83% وەلاتیان خۆ تۆماركریە، كێمترین رێژەیا تۆماركرنێ ژی ل پارێزگەها دهۆكێ بوویە، هەتا حەفتیا بۆری گەهشتبوو 68%ێ، پشتی پرۆسە ب دوماهی دهێت، ناڤ بۆ بەغدا دێ هێنە هنارتن و هەردێ پرۆسە بەردەوامبیت، بەلێ رێكارێن نوو دێ هەبن».
