مەهبیرانێن هەلبەستەکێ
ڤیان محەمەد
ئەز پشتڕاستەکا
گۆمانێ ب قورچەکێ داعویرایی
تو د هونەرێ ڕازیکرنێ دا
پەهلەوانێ بلوولژەنێ مارێ ئاریایی
ئەز مامزەکا ژ خێلی ڤەقەتیایی
تو نێچیرڤانێ زۆزانەکا بەردریایی
پەهلەوانێ هەناسەیێن دوبارە ڤەگەریایی
ئەز پرتەک ژ بەستییا سیفاندۆکێن ڤەمایی
تو ئاگرەکێ بێ نوورانی
جار ئەز ل بەر حەلیایی
جار ژی ڤەمریایی
ئەز مێرگەکا بهاری
پاییز ب سەردا قڕیایی
تو مایکئاپەکی فێلبازی
ڕەنگێن خوە و پەیڤێن من
ب جوانی
تێک شێلایی
جار ژی پەلەمارکری و پشتگوھ هێلایی
وایی ل منا بێ فێل و نەزان
کەنگییەک نینە ئیسکا ئاشکەرابوونێ بگریت
دەمەک نینە مۆرکا خەوێ
ل سەر خوەشییا تە ب خوار بکەڤیت
کێلیکەک نینە ب کەلاندنا حەزێن خوە
بەرهەڤییێن سفرا چاڤەرێبوونا من دخەملیت
ئەی زەلامێ سەرسام
هینگێ هیلاکا برسێ ف تە دکەڤیت
دەما کەلینا من سار دبیت
هینگێ تە بیر ل هاتنێ دهێت
دەما حەزا من د بەندەمانێ دا
ڕادوەستیت
ل وی چاخی دبیە میر
دەما ژەهرا سێربەندییێ
دگەهێن مندا دزێت
و
بۆ هەتا هەتایێ من دنڤینیت.
