مە بنڤینە
بژیان سەبری مەسیحا
ئەی شەڤڕەڤنكێن شەڤێن تاری
هوین دهشیارن!!
ئەڤە چییە ل وەلاتێ من رویدەت
بۆچی لەهی و ئاگر
بۆچی بیڤەلەرزێن دەڤگر
بۆچ مرۆڤ مرۆڤان نابینن
هەر تشت بوویە كەڤال
دویكێل بوویە خەیال..!!
چ دویكێلە د ناڤ ڤێ گێلەشۆكا شەڤێ دا؟
چ خەونە كەتیە د ناڤا مالپێچكێ رۆژێ دا
ئێڤارێن وەلاتێ من ب ڕۆندكێن عەسمانی دئێشن
ل شوینا كراسێ بویكینییێ.. ڕەشی دپۆشن..!!
دوهی زاڕۆكا بویكا بارانێ
بۆ چەند چپكا ل كۆلانا دگێراند
لێ ئەڤرۆ د ناڤ توڕەبوونا وێ دا، د وندا نە
بنێڕە
چ تشت لبەر تە بەرزە نینە
ئاسمان ژی.. ژ بۆ ڤێ كارەساتێ،
گەلەك یێ خەمگینە..
هەمی كەڤال ب ماتەمینی،
ل ئاسمانێ من ب شینی نە..
ل شوینا كزگریۆكا د سینگێ زاڕۆكێن دوهی دا
د مژ و مورێن باڕۆڤێن ئەڤرۆ دا دبێ هیڤینە..
ئەی خودا ل ڤی باژێڕی..
سپێدەهی ب ڕۆندكا دهەلن
و ئێڤار ب دویكێلێ ئاڤا دبن
مۆركا خەوێ ل سەر سینگێ مە بدانە
و وەكی هەڤالێن شكەفتێ..
بۆ نڤستنەكا بێ ڕابوون،
مە بنڤینە…!!
