مە ب جلكێن لەشکری ڤە هێرش کرە قائیمقامیا زاخـۆ
دیدار: رەمەزان دەشتمری/ زاخۆ
1 – 2
پێشمەرگە و بەرپرسێ ڕیكخراوا مێردین یا سەر ب لیژنا ناوچا زاخۆ ڤە، ( سمایل سمایل شبلی) ل سالا 1954ی خەلكێ گوندێ دەركارا نێریا یاسەر ب ناحیا دەركارعەجەمێ ڤە ژ دایكبوویە، ل سالا 1974ی ل گەل هێزا پاسەوانی(حرس حدود) ل گەل فەوجا زاخۆ هاتبوو وەورگرتن. ل دەمێ شۆڕەشا ئیلۆنێ ل سالا 1974ی ل گەل هێزا زاخۆ بەتالیونا سێ یا خودێ ژێ ڕازی (عەلی عەلی) بوویە پێشمەرگە، و پاشی بۆ تیما ئەسنادی یا توپا (106) و بەشداری خولەكا لەشكری بوویە.
پێشمەرگەیێ شۆرەشا ئیلونێ تایبەت بۆ رۆژنامەیا ئەڤرو گۆت: پشتی نسكویا شۆرەشا ئیلۆنا مەزن ئەز وەك كوڕە جوتیارەك ل گوندێ دەركارا نێریا من كارێ ڕینجبەری و جوتیاریێ دكر، ل سالا 1976ی ل گەل شەهید عەمەرێ لەعلێ دناڤ ڕێزێن ڕێكخستنا نهێنی یا پارتی دیموكراتی كوردستان دا هاتم ڕیكخستن و مە دەست ب كار و چالاكیێن نهێنی یێن ڕیكخستنێ كرن، كو ل ئەوی دەمێ ئابونێن پارتایەتیێ (2) دەرهەم مە ئابونە ددان، ل هەیڤا دوازدە سالا 1979ی من پەیوەندی ب ناڤ ڕێزێن شۆڕەشا 26ی گولانا پێشكەفتنخواز كر و ل بارەگایێ لەقی ئێك ل كوماتەی بوومە پێشمەرگە، و پشتی بورینا چەند هەیڤەكان ئەز ژ بارەگایێ كوماتەیی دئەركێ پێشمەرگایەتیێ دا مام و پاشی بۆ مەفرەزا فەرماندە سادق عەمەر دەركاری هاتم ڤەگوهاستن.
سمایل سمایل شبلی هەروەسا گۆت: پشتێ كونگرێ نەهێ یێ پارتی دیموكراتی كوردستان هاتی بەستن و بڕیارا لیژنە و ڕێكخراوا هات كرن، ل ئەوی دەمێ ڕیكخراوەكا پێشمەرگەیی ب ناڤێ ڕیكخراوا شەهید شەهباز سالح ب سەر پەرشتیا فەرماندە سادق عەمەر هات پێكئینان، وی دەمێ ئەز بوو مە ئامر مەفرزە ل گەل ئەڤێ رێكخراوێ و بەشداری د چەندین كار و چالاكیێن لەشكری دا ل دژی عەسكەر و دام و دەزگەهێن حكومەتا ئیراقێ یا وی سەر دەمی كرن، دچالاكەیكا لەشكری دا ئەوژی ل سالا 1983ی ژبۆ لێدانا ڕەبیا ل هنداڤی گوندێ دەركار عەجەم د ئەوێ چالاكیێ دا ب گرانی ئەز بریندار بووم، و دوماهیا سالا 1983ی ژ بەر قەهرەمانی و وەفاداری و چالاكیێن لەشكری ئەز هاتم هەلبژارتن كو ببمە جێگرێ ڕێكخراوا شەهید شەهباز سالح و ل سەر ئەرك و خزمەتا پێشمەرگایەتیێ بەردەوام بووم، ل دەستپێكا سالا 1986ی ئەم وەك پێشمەرگیێن ڕیكخراوا شەهید شەهباز سالح ل جادا گشتییا د ناڤبەرا گوندێ بێرسڤی و كومەلكەها هیزاوا دا ل جهەكێ دبێژنێ(گركا ئاخین) كەفتن دناڤ بوسەیكا مەفەزا ئیستخباراتا حكومەتا ئیراقێ دا و ئەز و هەڤالەكی خۆە ب ناڤێ (كەمال عەلی محێ ) بریندار بووین، بەلێ خوەش بەختانە ب هێز و شیان و شارەزایا خۆە یا پێشمەرگایەتیێ ب سلامەتی ژناڤ ئەوێ بوسەیا دوژمنی ئەم قورتال بووین، هەر وەسا ل سالا 1986ی ژبەر زیرەكی و قەهرەمانی و وەفاداریا من بۆ پارتی و شۆڕەشێ ئەز بوومە بەرپرسێ رێكخراوا شەهید شەهباز سالح و دهەمان دەمدا ناڤێن ڕێكخراوان هاتن گوهارتن و ناڤێ ڕێكخراوا مە ژ ناڤێ رێكخراوا شەهید شەهباز سالح كرە ڕێكخراوا (مێردین) هەر سەر ب لیژنا ناوچا زاخۆ ڤە.
پێشمەرگەیێ هەر دو شۆرەشان زێدەتر دیاركر، هەر وەسا ل سالا 1987ی ل دەمێ لێدانا فەوجا بێبادێ دئەوێ چالاكیێ دا ئەز ب گرانی برینداربووم، و خوەش بەختانە ئەو فەوجە ب زەند و باسكێن پێشمەرگەیێن قەهرەمان هات ڕاكرن و ژناڤبرن، ل دەستپێكا سالا 1988ی ژبۆ مەبەستا چارەسەریێ و ئینانا چەك و تەقەمەنیان ئەز و ل گەل سێ هەڤالێن خۆە یێن پێشمەگە ب ناڤێ( عەمەر سالح و سەلام ئەحمەد تیانی) بۆ ڕۆژئاڤایێ كوردستانێ چوین، و ل باژێڕێ شامێ من چارەسەریا هندەك نەخوشیێن لەشێ خۆە ل وێرێ كرن، ل 3/9/1988ی و ب ڕیكا گوندێ قەرەولا بۆ كوردستانێ هاتن و ل ناڤ ئاخا وەلاتێ توركیا ل دەڤەرا گوندێ گرێ گەوری ب ڕێكێ هاتن و كەفتن دناڤ بوسەیەكا عەسكەرێ توركیادا، بەلێ خوەشبەختانە ئەم ب سلامەتی دناڤ ئەڤێ بوسەیێ دا دا قورتالبین، پشتی ل دەڤەرا گوندێ قەڕەولا دەربازی ئاخا كوردستانێ بوین و بۆ جادا سەرەكی د ناڤبەرا گوندێ حەسەن ئاڤا و باژێڕێ زاخۆ دەربازی جادا گشتی بووین و بۆ گوندێ بێتاسێ چووین. ل ئەوی دەمی دەڤەر و گوندێن كوردستانێ هەمی هاتبین سۆتن و كاڤلكرن و هەمی جهێن دەڤەرێ فەوجێن جاشا و عەسكەرێ حكومەتا ئیراقێ لێ ئاكنجی ببین، ب ڕۆژێ نەچار دبین مە خۆە دناڤ نهال و دەحل و تراشاندا هەشار دا و ب شەڤێ ب ڕیكێ دچوین هەتا ب شەڤێ بۆ كومەلگەها بێرسڤی هاتن و مە ب نهێنیڤە هندەك خوارن و نان ژ مالەكێ پەیداكر، و ب ڕیكا گوندێ سنداڤا و گوندێ بوسەلێ ڕا گەهشتن دەڤەرا گوندێ ئەڤله و پیربلا دا و مە ل جهەكێ دبێژنێ شەشداری مە خۆە ب ڕۆژێ ل ئەوی جهی دا هەشارێ و كو ل ئەوی دەمی عەسكەرێ ئیراقێ ل هنداڤی سەرێ مە و چاڤدێریا دەڤەرێ دكرن، ئەم نەچاربین مە دناڤ ئەوان دەحل و تراشان دا مە خۆە هەشاردا و ب شەڤێ بۆ ڕیكێ چوین هەتا ل دەڤەرا زاویتەیا گەلیێ پساغا دەربازی سنورێ توركیا بووین، و مە خۆە ڕادەستی عەسكەرێ حكومەتا توركیا كرن، كو ل ئەوی دەمی مال و خێزانا مە ل كەمپا ئامەدێ ئاكنجی ببوون.
سمایل سمایل شبلی دیسان دووپاتكر، هەر ل ئەوی دەمی عەسكەرێ توركیا ل قەرەقولا عەسكەرێ توركیا ئەم هاتن دەستەسەركرن و پشتی بورینا پازدە ڕۆژان و ئەم لسێ قەرقولێن گوندێ زێڤیا و بێجوهێ و شردێ و ل دویڤدا ئەم تەسلیمی كەمپا ئامەدێ كرن، ئەم وەك پەنابەر ل كەمپا ئامەدێ مە ڕۆژانێن خۆە دناڤ كەمپێ دا مە بوراند و پشتی مە شەڕەدەڤەك ل گەل جەماعەتێن میتا توركیا ل ناڤ كەمپێ داكرین، و ئەم وەك تومەتبار لێ هاتن و ئەز نەچاربووم و ل سالا 1990ی ژكەمپا دیاربەكر ب جه بهێلم و من قەستا وەلاتێ یەونانێ بكەم، وەكو پەنابەر و ل سالا 1994ی ئەز ئاوارەیی وەلاتێ كەنەدا بووم وەكی پەنابەر هاتمە وەرگرتن، ل سالا 1997ی ڤەگەڕیام كوردستانێ و من دەست ب معاملاتێن خۆە یێن پێشمەرگایەتێ كرن، و ل دویڤ بڕیارا وەزارەتا پێشمەرگەیی ب پلەیا (رائید) و من دەواما فەرمی ل فەرماندەیا دهوكێ كر، و هەر ل ئەوی دەمی ئەركێ من یێ پێشمەرگایەتیێ ل پشتی سەرهلدانێ ل فەرماندەیا دهوكی ئەركێ خۆە دبینم، ب ڕاستی ئەڤ خزمەت و ماندیبون و دەردەسەری و ژیارا چل و چیان و برینداری هەتا نوكە ب تنێ پلەیا من وەك (ڕائید)هاتیم خانەنشینكرن، و هەتا نوكە بێ بەهربویمە ژ پەخشینا (مەدالیا بارزانی) لەوما ئەز ئەڤێ نڤیسنێ ب ڕیكا ڕۆژنامەیا ئەڤرو داخوازنامێ ئاڕاستەیی هەر جهەك و لایەنەكی پەیوەندیدار دكم، چاڤخشاندەكێ ل بابەتی بكن و ڕەوشا خزمەت و خەباتا من ل بەرچاڤ بێت وەرگرتن.
ئەو كاروچالاكیێن نهێنی و لەشكری یێن ل سەر دەمێ شۆڕەشا ئیلۆنا مەزن و شۆڕەشا 26ی گولانا پێشكەفتنخواز دا كرین ئەڤێن ل خوارێ دیاركری نە:
1- ل دەمێ ئەم ئێک ئەندامێن ڕیكخستنا نهێنی مە بەلاڤوك و چاپەمنیێن نهێنی یێن پارتی و هەستا نەتەوەیی ل ناڤ كەنج و خورتێن كوردستانێ دا بەلاڤەدكرن.
2- ل سالا 1979ی دەمێ بارزانی ئەمرێ خودێ كری بۆ ماوێ دوو حەفتیان من رهێن خۆە نەچێكرن، و ل ناڤ بازارێ زاخۆ ئەز ژلایێ ئەمنا زاخۆڤە هاتم دەستەسەركرن، و نەچاركرم ئەز برم دەف سەرتراشی و رهێن من دانە چێكرن.
3- هەر ل سالا 1979ی ڕەشەكێن ئەمنا زاخۆ سەرملكێن من دناڤ بازارێ زاخۆدا بڕین و سڤكاتی ب جل و بەرگێن مە یێن كوردەواری كرن، ژبەر ئەڤێ چەندێ من قەستا ناڤ شوڕەشێ كر.
4- سالا 1981 ی بەشداری دلێدانا ڕەبیا (كمرێ شیشێ) ل هنداڤێ دەشتەتەخێ دا كر.
5- سالا 1981ی پشكداری د لێدان و راكرنا ڕەبیا ینێ گوندێ بێرسڤی دا كر.
6- سالا 1981ی ل دەڤەرا گوندێ منینی ل تەنكا بانكێ كەفتن دناڤ كەمینەكا مەفرەزا ئێسخباراتا حكومەتا عیراقێ دا.
7- سالا 1981 ی ل ناڤ گوندێ خیزاڤا كەفتن دناڤ كەمینەكا عەسكەری دا.
8- سالا 1982ی لێدان و ڕاكرنا ڕەبیا ب هنداڤی گوندێ پەرەخێ هات راكرن.
9- ل سالا 1982ی كەفتن دناڤ كەمینەكا عەسكەرێ توركیا ل دەڤەرا گەلیێ شیڤئەرمنیا ل سەر سنورێ توركیا.
10- ل سالا 1982ی ڕاكرنا ڕەبیا (گەفشهێ ل هنداڤی گوندێ شەرانشا سەری یا فلەها.
11- ل سالا 1983ی راركنا رەبیا ڕبیا گرێ ئیسفكا ل بنێ گوندێ جەلكا بەرواریا.
12- ل سالا 1983ی لێدانا ڕەبیا گابنێركی ل هنداڤی گوندێ ڕاڤینا و سێ هەڤالێن مە بریندار بووین و ئەوان كەسێن ب گرانی برینداربویی هەڤال( سمایل پشو)بی.
13- ل سالا 1983 لێدانا ڕەبیا ل كوندێ دەركار عەجەم و ئەوێ چالاكیێ دا ئەز برایێ ئەحمەد و عەلی سور و ل گەل سێ پێشمەرگەیێن دیتر برینداربین.
14- ل سالا 1983ی كەفتن دناڤ كەمینەكا مەفرەزا ئیستخبارتێ ل تەنشت گوندێ گرك سندی دا.
15- ل سالا 1983ی ئینا دەرمانێن نەخوشخانا گومەلكەها تلكەبەرێ بۆ ناڤ شۆڕەشێ
16- ل سالا 1983ی ل گەل سێ هەڤالێن پێشمەرگە ب ناڤێ( شەفیق خواجە و سمایل پشو) ب جل و بەرگێن عەسكەری بۆ لێدانا قایمقامیا قەزا زاخۆ .
17- ل سالا 1983ی د ناڤبەرا كومەلگەها بێرسێ و كومەلگەها هیزاوا كەفتن دناڤ كەمینەیەكا عەسكەری دا و خوەشبەختانە ب سلامەتی قورتال بین.
18- ل سالا 1983 ی دەینانا كەمینەكێ ل بەر ترومبێلەكا عەسكەری د ناڤبەرا تاخێ شەعبانیكێ و سێمالكا دا.
19- ل سالا 1983ی دەینانا كەمینەكێ ل تەشت جامعا ڕەیان ل تاخێ سێمالكا و مدەڕعەكا عەسكەری كرە ئارمانج.
20- ل سالا 1983ی دووجاران لێدانا ڕەبیا ل هنداڤێ گوندێ شێخ مەما هاتكرن.
21- ل سالا 1983ی دوو جاران دەینانا كەمینەكێ ل گوندێ ملاعەرەبێ و زیانەكا مەزن ب عەسكەرێ حكومەتا عیراقێ كەفت.
22- ل سالا 1984 ی دەینانا كەمینەكێ ل بەر ترومبێلەما (جیب قیادە) دناڤبەرا تاخێ شەعبانیكێ و تاخێ ڕكاڤادا.
23- ل سالا 1984 ڕاكرنا ڕەبیا گوندێ چەمشكو.
24- ل سالا 1984 لێدانا ڕەبیا گوندێ متیفا.
