مە دڤێت ب رێیا سینەمایێ خزمەتا هونەر و كلتۆرێ كوردی بكەین
زنار تۆڤی:
خەلیل عەزیز ئوغلۆ، ئەكتەرەكێ خەلكێ باكورێ كوردسانێ، د دیدارەكێ دا بۆ رۆژناما ئەڤرۆ دیاركر كو ل سالا 1989 ێ وی دەست ب كارێن هونەری كریە و پشكداری د چەندین شانۆگەریان دا كریە، هەروەسا پشكداری د شەش فلمێن درێژ یێن سینەمایی و چار كورتە فلمان دا ژی كریە، دووماهی فلمێ وی پشكداری تێدا كری، فلمێ (سیه سال و ئێك شەڤ) بوو، وی فلمی پشكداری د فلمە فیستەڤالا هۆكێ دا كربوو، ناڤەرۆكا وی فلمی بەحسێ دایكەكا كورد دكەت ل سالا 1993 كوڕێ وێ بەرزە دبیت و بۆ دەمێ 33 سالان ئەو ل كورێ خۆ دگەریێت، بەلێ مخابن نابینیت، ل دووماهییێ ئەو ژن قەستا گوندێ خۆ دكەت، هەر چەندە گوندێ وێ ژلایێ دەولەتا تورك ڤە هاتیە كاڤلكرن و سۆتن، كو ل وی دەمی دەولەتا تورك پێنج هزار گوندێن كوردان ل باكورێ كوردستانێ وێرانكربوون، ئەو دایكە دهێتە گوندێ خۆ و هیڤی دكەت كوڕێ خۆ ب بینیت، بەلێ هەر كورێ خۆ نابینیت و ل دووماهیێ ژ قەهرا كورێ خۆ دا ئەو دایكە خۆ د هاڤێژیتە د بیرەكا ئاڤێ دا و خۆ دكوژیت.
ناڤهاتی گۆت: نوكە كورد فلمێن سینەمایی چێدكەن و كوردان هۆلێن سینەمایی هەنە، فلم ب زمانێ كوردی دهێنە چێكرن، دیسان كانێ چاوا ل وەلاتێن جیهانی فلمە فیستەڤال دهێنە چێكرن، وەسا ل دهۆكێ ژی دهێنە چێكرن و ئەڤە شانازیەكا مەزنە بۆ هەموو كوردان، هەروەسا مە دڤێت ب رێیا سینەمایێ خزمەتا هونەر و كلــــــتۆرێ كـــــــــوردی بكەین.
