مە دڤێت هەموو پرسێن هەی دوور ژ شەڕی چارەسەر بکەین

مە دڤێت هەموو پرسێن هەی دوور ژ شەڕی چارەسەر بکەین

1

بەرپرسەکێ حوکمەتا سووریێ دیار دکەت، ئەمریکا ل دژی ڤێ یەکێ یە شەڕ د ناڤبەرا شامێ و هەسەدێ دا روو بدەت و نها بزاڤەکا مەزن یا هەی ب رێیا دانوستاندنان هەموو پرسێن هەی ل گەل رێڤەبەریا خوەسەر بهێنە چارەسەرکرن و ئەمریکا ژی ل سەر خەتە.

بەرپرسەکێ وەزارەتا ناڤخوە یا سووریێ کو ناڤی وی نەهاتیە ئاشکرا کرن بۆ ئاژانسا رویترز یا نووچەیان دیار کریە، راستە بەری چەند رۆژان پەیوەندیێن شامێ و هەسەدێ گەلەک ئالۆز بوون، لێ چو بەرهەڤی بۆ شەڕەکێ ل دژی هەسەدێ نینن، چونکی ئەمریکا ژی رێ نادەت تشتەک وەسا روو بدەت، هەروەسا د ئاستێ وەزارەتا دەرڤە و بەرگریێ یا ئەمریکا دا فشارێن گەلەک مەزن ل سەر شامێ ژی هەنە کو نابیت ئێرشی هەسەدێ بکەت، ئەو یەک دێ ئەنجامێن خوە یێن گەلەک خراب بۆ هەموو سووریێ هەبیت و ژ بەر ڤێ یەکێ ژی نها ئەمریکا و فرەنسا گەلەک بزاڤان دکەن دا شام و هەسەدە پرسێن هەی دوور ژ شەڕی چارەسەر بکەن.
هەمان بەرپرسی ئەو یەک ژی دیار کریە، بەری نها رێککەفتنەک د ناڤبەرا ئەحمەد شەرع و فەرماندارێ هەسەدێ دا هاتیە ئیمزا کرن و ل گۆر وێ رێککەفتنێ ژی دڤێت هەسەدە ببیتە پشکەک ژ وەزارەتا بەرگریێ، لێ ل سەر ئالیەتا چاوانیا پێکڤە کارکرنێ ئاریشە هەنە و ژ بۆ ڤێ یەکێ ژی نها دانوستاندنێن باش دەستپێکرینە و بەرپرسێن رێڤەبەریا خوەسەر ژی دخوازن ل گەل شامێ بگەهنە رێککەفتنەکا باش.
هەر سەبارەت دانوستاندنێن ل گەل شامێ، ئیلهام ئەحمەد بەرپرسا پەیوەندیێن دەرڤە یا رێڤەبەریا خوەسەر ژی دیار کر، پێدڤیا سووریێ ب سیستەمەک نە ناڤەندی هەیە کو هەموو گەلێن سووریێ بشێن پێڤکە وەکو برا بژین، ب شەڕی چو پرسەک ناهێتە چارەسەرکرن و دڤێت د دستوورێ سووریێ دا مافێن گەلێ کورد و پێکهاتەیێن دی یێن سووریێ بهێنە گەرەنتیکرن، ژ بۆ ڤێ یەکێ ژی دانوستاندنێن وان ل گەل شامێ بەردەوام دکەن، لێ هەتا نها چو پێشڤەچوونێن دلخوەشکەر روو نەداینە و دانوستاندن ژی بەردەوام دکەن.
سەبارەت ب گەفێن تورکیا ژی ئیلهام ئەحمەد دیار کر، وەکو رێڤەبەریا خوەسەر مە پەیوەندی ل گەل تورکیا هەنە و مە دڤێت تورکیا ببیتە ئالیێ چارەسەریێ، نابیت تورکیا ل دژی مافێن رەوا یێن گەلێ کورد بیت ل سووریێ، وەکو رێڤەبەریا خوەسەر وان دڤێت پەیوەندیێن باش ل گەل تورکیا دروست بکەن، گرنگە بەرپرسێن تورکیا ژی ب جهێ گەفکرنێ بزاڤا ڤێ یەکێ بکەن پەیوەندیێن خوە ل گەل کوردێن سووریێ باش بکەن، ئەو یەک ژ بۆ ئارامیا سووریێ و رۆژهەلاتا ناڤین ژی گەلەک یا گرنگە، چونکی کوردان دڤێت د سووریایەک نوو دا ل گەل هەموو پێکهاتەیێن دی وەکو برا پێکڤە بژین.

کۆمێنتا تە