مە دڤێت و دێ كوژین
غیاس خـالد زێباری
ئیراق ب گشتی وەلاتەكێ زەنگینە ب نەفت و گازێ، دەمێ سەد سالایە ئەڤ بەرهەمی ژێدەرێ سەرەكیێ دەولەتا ئیراقێ و زێدەتر ژ 90% میزانیا ئیراقێ پێك دئینیت، لێ ژبەر بێ سەروبەریا ئیدارەدانێ، نەشیایە ڤی داهاتێ زەبەلاح بێخیتە د خزمەتا پێشڤەچوونا وەلاتی و بەختەوەركرنا خەلكێ خوە دا، بەلكی هێشتا ئیراق ل وەلاتێن پێشیێ یە ل سەر ئاستێ جیهانێ ژلایێ هەژاریێ و پاشكەفتنێ، ئەڤە ژی ژ ئەنجامێ هەبوونا گەندەڵیەكا زۆر و نەبوونا سیاسەتەكا سیستەماتیكە. هەرێما كوردستانێ ل ڤان سالێن داویێ پشتی سیاسەتا گەمارۆدانێ ژلایێ ئیراقێ ب نەچاری پەنا برە بەر دەرئینا نەفت و گازێ و حوكمەتا هەرێمێ شیا ب داهاتێ وێ یێ سنووردار، خوە رابگریت و هەوێن پێشڤەچوونێن گەشەیا ئابووری و ئاڤەدانیێ دەسپێكرن. مخابن لجهێ دەولەتا ئیراقێ دەسخوەشیێ ل حوكمەتا هەرێمێ بكەت، دەست ب دروستكرنا ئاستەنگێن زێدەتر كرن و ل داویێ شیا نەفتا كوردستانێ رابگریت و كار گەهشتە برسیكرنا خەلكێ كوردستانێ ب رێكا بڕینا مووچێ خەلكێ كوردستانێ و ب ڤێ ژی رانەوەستان ب رەفتارێن شۆفینیانە و ژبۆی لاوازكرنا پێگەهێ هەرێما كوردستانێ پرسا مووچێ خەلكێ كوردستانێ ب پرسێن سیاسی گرێدا و داخوازا هەمی داهاتێ نەفتێ دكەن، هەرچەندە ل داویێ لێكتێگەهشتن دناڤبەرا هەرێمێ و بەغدا دروستبوو بۆ رادەستكرنا 230 هەزار بەرمیلێن نەفتێ رۆژانە، لێ یا سەیر ئەوە ژلایەكی داخوازا نەفتێ دكەن، ژلایەكێ دیتر میلیشیایێن چەكدارێن ئیراقێ بیرێن نەفتا كوردستانێ ب دروونان وێران دكەن، جهێ حێبەتیێ یە ژلایەكێ داخوازا تشتەكی بكەی و ژلایەكێ دیتر وی تشتی ب كۆژی و ژناڤ ببەی ..! لێ دیار دەستهەلاتا ئیراقێ ب تایبەت حوكمەت بەرامبەر وان گرۆپێن چەكدار یا بێ دەستهەلاتە، ئەوێن دڤێن ئابوورێ ئیراقێ لاواز بكەن و ناكۆكیێن دناڤبەرا وێ و هەرێمێ كوورتر و بێ چارەسەر بهێلن، چونكی نەفتا كوردستانێ بەشەكێ سەرەكیێ ئابوورێ ئیراقێ یە . لێ دیارە دەستێن سیاسیێن رەش ل پشت هەنە و نەڤێت هەرێم و ئیراق بگەهنە چارەسەریێن بنەڕەتی و دەستووری، ئەگەر نە بۆچی بڤی رەنگی دربا ل ئابوورێ ئیراقێ و كوردستانێ ددەن؟ پێدڤییە حوكمەتا ئیراقێ بەری یا كوردستانێ لەزێ ل رێگرتنا ڤان رەفتارێن تیرۆستی بكەت، چونكی وان گرۆپا نەڤێت ئابووری ئیراقێ پێشبكەڤیت و رێكەفتنێن وێ یێن دگەل هەرێمێ سەربگرن و برسیكرنا خەلكێ هەرێمێ یا بەردەوام بیت ب مەرەما لاوازكرنێ، ئەڤە ژی نە خزمەت پرۆسا ئاشتەوایا جڤاكێ ئیراقێ دكەت نە سەقامگیری و ئێشڤەچوونێن ئابووری، ئەگەر تە تشتەك بڤێت دێ پارێزی.
