مە دگۆت ئەگەر ئەم شەهید نەبین ئەم دگونەهبارین
بامەرنێ، سالار محەمەد دۆسكی:
پێشمەرگەیێ هەر دو شۆرەشێن ئیلۆن و گولانێ (ئیبراهیم شوكری محەمەد زێوا شێخ پیراموس) یێ بەرنیاس ب (ئەنوەر شوكری) ژ دایك بوویێ سالا 1956ێ، ژ بەر رەوشا كوردستانێ ب گشتی و دەڤەرێ ب تایبەتی نەچوویە خواندنێ، دیاركر كو ل سەر دەمێ پێشمەرگەیاتیێ مە دگۆت: ئەگەر خوە ئەم شەهید نەبین ئەم د گونەهبارین دەرهەقا ڤی مللەتی دا.
ئەنوەر شوكری، د دیدارەكێ دا ل گەل رۆژناما ئەڤرۆ گۆت: دەمێ چوویم ناڤ پێشمەرگەیی و من قەستا شۆرەشێ كری ل سالا 1967ێ بوو و ئەم چووینە دەڤەرا (دولە رەقێ) وی دەمی گەنج بووین وی دەمی ب هاریكاریا برایێ خوە شەهید (تاهر زێوەی) بوومە پێشمەرگە وی دەمی هێزا شەهید (فارس كورەماركی) بوو وی دەمی ئەو ئامر سری بوو وی دەمی شورەشێ تڤەنگ زیكا نەدانەف پێشمەرگەی بەلێ چونكە برایێ من دناڤا پێشمەرگەی دا بوو هەر زیكا چەكێ شورەشێ من هەلگرت و دەمێ چوویمە ناڤ پێشمەرگەی ل (دولە رەقێ) ل پشتا بەنداڤا دوكان ل دەڤەرا سلێمانیێ هەر دەم جهێ رویپ ریبوونا پێشمەرگەی ل گەل دوژمنی بوو باوەركە هەر دەم شەر د ناڤبەرا حوكمەتێ و پێشمەرگەی دا بوو لەوما هەر زیكا و هەر ل دەسپێكا چوونا مە بۆ ناف شورەشا ئیلونێ كەفتینە ناڤ شەران، دیسا ل (گەلیێ رەش) ژی شەرێن مەزن تێدا هاتنەكرن وی دەمی گەنج بووین و هەر مە دگۆت شەرمە بۆ ئازادكرنا ڤی وەلاتی ئەم شەهید نەبین.
ئەنوەری ئەو ژی گۆت: ل شورەشا ئیلونێ شەرێ جەبهەی بوو دناڤبەرا هێزێن پێشمەرگەی و لەشكەرێ رژێمێ داو زێدەتر شەرێ توپا دهاتەكرن و زێدەباری چەكێ مەزن ژی ب هەمان شێوە ل گەلیێ(پلنگانێ) بووین ل دەڤەرا (دولە رەقێ) شەرێن هوسا مەزن وی گەلی دا دهاتەكرن دناڤبەرا مە دا چ دەور و زەما رژێمێ هوسا خوە نەدیت بوو ل گەل پێشمەرگەی و باوەرنەدكر كو ئەڤە هێزا پێشمەرگەی یە و گاڤ بۆ گاڤێ مورا پێشمەرگەی بلند بوو و سەركەفتن لدیف سەركەفتنێ هەتا گەهشتیە وی ئاستی مەترسی كەفتە ژنافچوونا حوكمەتا بەغدا چونكە ب هەمی رەنگا خوە تاقیكرن ل گەل پێشمەرگەی و نەشیا گاڤەكێ بهێتە پێش ڤە و ئەڤە ئەگەرەكێ سەرەكی بوو بەیانا 11ی ئادارێ ل سالا 1970ێ ژدایك بیت و رژێم نەچاربوو دانتپێدان ب مافێن مللەتێ كورد كر.
هەمان پێشمەرگە گۆت: وی دەمی زمانەكێ تایبەت دناڤبەرا پێشمەرگەی و خەلكی دا هەبوو ژ بەر وێ چەندێ گەلەك جاران پێشمەرگە دەمێ پێدڤی ب چەكی هەبا دا گازی كەت فلان جورێ فێقی بوومە بینن یان بوومە فلان خوارنێ وی كەسەكی نەدزانی بەحسێ چ جورە چەكی دهێتەكرن، وی دەمی دبەرهەڤبووین ئەم هەمی بهێنە شەهیدكرن چونكە ڤیانا وەلاتی گەلەك یا ب بهابوو و ب عەشق بوو وی دەمی بتنێ كلاشینكوف من هەلدگرت.
ئەنوەر شوكری، پێشمەرگێ هەر دو شورەشێن ئیلون و گولانێ نەڤەشارت و گۆتژی: گەلەك جاران كەفتینە دەلیڤێن بەرتەنگ دا و مە مرنا خوە دیتی یە و مە هزر كریە دووماهی جارە دژیانێ دا لێ خودێ پاراستی نە چونكە ل سەر رێكەكا دروست بووین و مە داخازا مافێن خوە دكر و مە شەر بۆ پاراستنا ئاخ و شەرەفا مللەتێ خوە دكر و كەسەكێ بۆ چ بەرژوەندی یێن تایبەت نەدكر بەلكو هەر هەمی پێشمەرگێن بارزانی بوون، ل شورەشا ئیلونێ دەستیردان گەلەك یا كێم بوو و بتنێ ئەگەر بۆ ماوێ 15 یان بیست رۆژا ل چەپەرێن دەسپێكێ بای دووڤ دا دا ڤەگەری دەستیردانێ و هێرڤەتر ئێی بەلێ مال هەر نەبوو، دەستیردان بۆ مال رەنگە پشتی بورینا چەند هەیڤان بوو و رەنگە هندەكا ب سالان ژی مالێن خوە نەدیتن و هەر ل شەران بوون وی دەمی مووچە (5) دینار بوو و پێشتر ئەو ژی نەبوو و هەر هەمی پێشمەرگە فیدائی بوو.
هەمان پێشمەرگە گۆتژی: جارەكێ مە خوە بەرهەڤ دكر كو ژ چەپەرێن بەرگێریێ بهێینە دەستیردانێ ل دەڤەرا (دولە رەقێ) كەفتینە دناڤا شەرەكێ گران دا وەك پێشتر من ئاماژە پێكری كو بەردەوام ل وێ دەڤەرێ شەر بووین و دئەنجامدا و چەند هەڤالێن مە شەهید بوون ئەو ژی (عارف كەڤلەسنی، یەحیا گەربەراسكی) ئەڤە ژ پێشمەرگێن چاف نەترس و قەهرەمان بوون خودێ ژ هەمی یان رازی بیت و زێدەباری بریندار بوونا چەندین پێشمەرگێن دی.
ئەنوەر شوكری و زێدەتر گۆت: دەمێ بەیانا 11ی ئادارێ ل سالا 1970 دناڤبەرا سەركردایەتی یا كوردستانێ ب سەرۆكاتی یا خودێ ژێ رازی (مەلامستەفا بارزانی) و رژێما وی دەمی یا ئیراقێ دا هاتیە موركرن گەلەك كەیفا مە هات و مە ل تلیلیا دا و دەوات و ئاهەنگێن مەزن هاتنەگێران چونكە ئەو بەرهەمێ خەباتا پێشمەرگێ كوردستانێ یا چەندین سالا بوو كو ب هەمی رەنگا رژێمێ چەك و گەفێن ژنافچوونێ دژی مللەتێ مە بكارئینان و نەشیا مە بشكێنت ئەڤجا ئەو رێكەفتن سومبلا بەرخودانا مللەتێ كورد بوو و نەبتنێ پێشمەرگەی بەلكو ژن و زارۆك و پیر و كالا و هەر هەمی خەلكی كەیف پێ هات و ئاهەنگ گێران.
پێشمەرگێ هەر دو شورەشێن ئیلون و گولانێ، ئەنوەر شوكری زێدەتر گۆت: هەر دەمێ ببا شەر بوومن كەیف و شادی بوو و ئەڤ ل سەر ڤێ هزرێ مەزن ب بووم و ئەڤە من ژ برایی خوە شەهید تاهر وەرگرت بوو و گەلەكا دگۆتە من تویێ شاشی لێ من هەر هزرا خوە دا دگۆت ئەگەر ئەم بۆ ڤی مللەتی نەدەینە شەهیدكرن ئەم دگونەهبارین، شورەشا ئیلونێ گەلەك یا خوش بوو و گەلەك جاران كاودانێن پێشمەرگەكێ سادە ژ بەرپرسێ وی خوشتر بوون وەك خوارن و جلك و یا بێ جوداهی بوو و هەر دەم پێشمەرگە و بەرپرسێ خوە پێكڤە خوارن دخوارن و ئەڤە هەمی هاندان بوو بۆ شەهیدكرنێ بۆ مللەتی.
هەمان پێشمەرگە گۆت: ل سالا 1975ێ دەمێ نەكسویێ تاهرێ برایێ من چوونە ئیرانێ و ئەم ماینە ل گوندێ خوە زێوێ و مە دەست هاڤێتە ژیانا گوندی و خودانكرنا تەرش و كەوالی و ژیانا گوندان و چاندنێ و ژیان هوسامە دەربازكر هەتا بوویە شورەشا گولانێ وی دەمی شەهید (تاهر زێوەی) هاتە دەڤەرێ و تایبەت گوندێ مە و ئەم جارەكا دی گەهشتینێ
هەمان پێشمەرگە گۆت: ل شورەشا گولانێ شەرەكێ مەزن یێ مان و نەمانێ ل (كەلا شێخو) 17/11/1980ێ دناڤبەرا پێشمەرگەی و رژێمێ دا دروست بوو وی دەمی (تاهر زێوەی و شەعبان غەفار بێدهی، جەمیل بێسفكی، نائیف زێوەی، حسێن زێوەی، عەبدوللا زێوەی، فەرست بێسفكی، حسێن بێسفكی، سالم بێسفكی، محەمەد بێسفكی، تاهر بێسفكی، خالد بێسفكی، عەبدوللا بێسفكی، سالم بێسفكی، خالد بێسفكی، عزیز ئەرزی، حەمید برۆشكی، سەفەر ئەلكیشكی) بوو دناڤا شەری دا وبوون و چەند پێشمەرگە شەهید و برینداربوون و ژوانا هەر دو برایێن من (تاهر و نایف) هەر دو بریندار بوون وی شەری دا پێشمەرگەی وانەك نیشا دوژمنی دا ب چ رەنگ و شێوا ئەوا هزر نەدكر پێشمەرگە دێ ب ڤێ هێزێ ڤەگەریت و ڤێ چالاكی یا پێشمەرگەی گەلەك دەنگ ڤەدا و خوینەكا نویتر بوو دناڤا شورەشێ دا ل وی دەمی .
پێشمەرگێ هەردو شورەشان گۆت: ژ دەلیڤێن نەخوش ل هەر دو شورەشان من دیتین دەمێ پێشمەرگەك شەهید بوو و هەمان دەم مە دگۆت ئەگەر ئەم شەهیدان نەدەین ئەڤ مللەتە دێ هەر یێ بن دەست بیتو ناگەهینە چ ئارمانجا و هەر دەما دلخوش بووین بۆ خەباتێ و بەرخودانێ.
ل دور هەوا ئەنفالان ژی هەمان پێشمەرگە گۆت: ل چیایێ مەتیا ئەم ماینە ئاسێ و مە گۆت دێ شەری كەین و ئەم خوە رادەستی دوژمنی ناكەین و دێ شەرێ مان و نەمانێ كەین و ماینە چیایی را و زارۆك و خێزان ل گەل مە و دووڤ دا هندەك ژ خەلكێ گوندێ مە زڤرین كو هژمارا وان (44) كەس بوون هاتن خوە رادەستی رژێمێ كر و هەتا نوكە دبێ سەروشین و كەسەك نوزانیت كیڤە برن و دووڤ دا حوكمەتا ئیراقێ لێبورینەك دەركر و ئەم كرینە ترۆمبێلا دا و ڤەگوهاستینە كەلها نزاركێ و دووڤ دا هاتینە رەوانەكرن بۆ دەڤەرا (جژنەكان) ل پارێزگەها هەولێرێ و چەند سالان ماینە ل وێرێ و دووڤ دا كوچا ملیونی چووینە ئیرانێ وپشتی ڤەگەریاین زڤرینە سەر گوندێ خوە و هەتا نوكە ل گوندێ خوە زێوا شێخ پیرامیس دژین.
ل دووماهیێ هەمان پێشمەرگە گۆت: داخازا ئێكگرتن و ئێك رێزی یا مللەتێ كورد دكەم و داخاز ژ رێبەرێن مە و تایبەت مالا بارزان دكەم ل هەڤال و قوتابیێن بابێ خوە ڤەگەرنە ڤەو پرسیارا ئەوان كەسان بكەن یێ ل رۆژێن تەنگاڤیێ خەبات و بەرخودان و شەهید و قوربانی بۆ ڤی مللەتی داین.
