مە ل بەرە ژۆرەکا سینەمایێ ل مۆزەخانا زاخۆ ڤەکەین
زاخۆ، دلۆڤان هالۆ:
لانە عەبدولسەلام، ڕێڤەبەرا مۆزەخانا زاخۆ د دیدارەکێ دا بۆ ڕۆژناما ئەڤرۆ دیار کر کو مۆزەخانا زاخۆ ژ پتری300 پارچەیێن شینواری و فۆلکلۆری پێك دهێت کو هەمی ل دەڤ کەسەکێ هاتبوونە پاراستن بناڤێ محەمەد کۆچەر کو وی پێشکێشی مۆزەخانێ کرن، و نوکە هەمی ل ڤێرێ دهێنە پاراستن، و مە ل بەرە ژوورەکا سینەمایێ ل مۆزەخانا زاخۆ ڤەکەین ل دوور مێژوو و مۆزەخانا زاخۆ، هەر دیسان مە ل بەرە هندەك کەلوپەلان ژ دهۆکێ ژی بەشداربکەین.
ڕێڤەبەرا مۆزەخانا زاخۆ، ئاماژە ب وێ چەندێ ژی کر کو مەرەم ژ ڤەکرنا مۆزەخانا زاخۆ دیارکرنا زەنگینیا مێژوو و پارچەیێن فۆلکلۆری و شینواری یێن زاخۆیە، داکو گەشتیارێن ناڤخوە و بیانی پێزانین ل سەر مێژوو و فلکلۆرێ زاخۆ هەبیت، وهەر گەشتیارەکێ سەرەدانا مۆزەخانێ دکەت پێدڤیە ئێکەم تشت مێژوویا زاخۆ بزانیت.
ئاشکرا ژی کر کو ئێك ژ کەڤنترین پارچەیێن ل ڤێ مۆزەخانێ هاتیە پاراستن بەرێ ئۆکسیدە کو مێژوویا وێ ڤەدگەڕیت بۆ سەردەمێ بەردێ چەرخین یێ ناڤین بۆ 7 هزار هەتا 10 هزار سالان، و دهاتە بکارئینان بۆ بڕینا کەلوپەلان و چێکرنا چەکی و پێدڤیێن جوانکارییێ.
گۆت ژی:»ژ وان پارچەیێن بووینە جهێ سەرنج ڕاکێشانا گەشتیاران ئامیرێ ئێکەم ڕادیۆیا زاخۆ کو مێژوویا وێ بۆ سالا 1950 ڤەدگەڕیت، و کورسیا ئێکەم مەتڕانێ زاخۆ و بەرێ مەزن یێ کو شوون پیێن مرۆڤێن بەرێ ل سەرە کو ل دەمێ نووژەنکرنا پرا دەلال هاتیە دیتن، و پەیکەرێ هەرقەلە کو ئێك ژ ئەفسانەیێن گریکی یێن بناڤودەنگە بۆ سەردەمێ هێلنستی ڤەدگەڕیت، وەکو خوداوەند د هاتە هژمارتن و ل دێرەبینێ هاتە دیتن».
زێدەتر ژی گۆت:»مۆزەخانا زاخۆ ل هەمی ڕۆژێن حەفتیێ ڤەکرییە ژ دەمژمێر9 ی سپێدێ هەتا 9ی شەڤ، و ل وەرزێ هاڤینێ هەتا12 ی شەڤ دمینیتە ڤەکری، و گەلەك کەسایەتیێن بناڤودەنگ ژ دەرڤە و ناڤخوە سەرەدانا مۆزەخانێ کرینە، و ئەڤ مۆزەخانە بۆ خەلکێ زاخۆ و یێ ژ دەرڤە یا سەرنج ڕاکێشە».
