مە پشت گەرمی ب یاریزانێن نافخوە كریە
رەمەزان زەكەریا
د داخۆیانیەكێ دا راهێنەڕێ تیما فوتبۆلا یانەیا شێخان دیاركر بەرهەڤەیێن وان بۆ وەرزێ ئەڤسالە باشترە ژ وەرزێ بۆری ب پلانەكا باش بەرهەڤی بۆ خولا پلا دو یا كوردستانێ هاتینەكرن و دیسان هژمارەكا یاریێن هەڤالینی هاتیە ئەنجامدان ژبۆ باشتركرنا ئاستێ و زانینا هێز و كێماسیان.
زێدەتر مەنهەل ئەلعەنزی بۆ رۆژنامەیا ئەڤرۆ گۆت: تیما مە یا فوتبۆلێ پێكهاتیەكێ ب هێز بەرهەڤكریە بۆ پشكداریكرن د خولا پلا دو یا كوردستانێ كو پتریا یاریزانا خەلكێ باژێری نە و یێن دەڤەرا ئاكرێ، بەردەڕەش و شێخان، گەشبینن دێ بنە هژمارەكا ب هێز د خولێ دا، ئەگەر ژلایێ ئابووری ڤە پشتەڤانیا یانەیا شێخان بهێتە كرن دێ ئاستەكێ نموونەیی پێشكەش كەت ب ساناهی گەهیتەپلا ئێك، مەزنترین ئاریشا یانەیێ خرابیا رەوشا ئابووریە، دخوازین پشتەڤانیا یانەیێ بهێتە كرن بۆ وێ چەندێ ئاستەكێ باشتر پێشكەش بكەت.
ناڤبری گۆت ژی: بۆ چەند سالە یانەیا شێخان بزاڤان دكەت بگەهیت پلا ئێك ل گۆر پلانا ئەڤسالە مە هیڤی هەنە ئاستەكێ باشتر پێشكەشبكەین و بۆ ئەڤسالە هەموو یاریزان ببنە جهێ باوەرییا مە و دلێ جەماوەرێ یانەیێ خوەشبكەن و ڤەگەڕینە پلا ئێكا كوردستانێ پێنەڤێت ئەركێ مە ژی ب سانەهی نابیت لێ ب مۆرالەكا بلند گەشبینن بگەهینە ئارمانجا خوە.
