مە گرۆپەك ب ناڤێ (یەزدا مۆزیك) دامەزراندیە
دلڤین رەشید:
مۆزیكژەن (رەدوان بەرجەس) د دیدارەكێ دا بۆ رۆژناما ئەڤرۆ دیاركر، ئەو دەرچویێ پشكا مۆزیكێ یە ل پەیمانگەها هونەرێن جوان ل دهۆكێ، بەری نەه سالان ئێكەم پێنگاڤا وی د ناڤ جیهانا هونەری دا ب ب گۆتنا سترانان دەستپێكر و ژبەر حەز و ڤیانا وی ب شێوازەكێ ئەكادمی چوو دناڤ جیهانا دناڤ مۆزیكێ دا ب تایبەت ژی ژەنینا ئامیرێ كەمانێ.
ناڤهاتی گۆت: هێدی هێدی ل گەل رێكخراوان وەكو گەنجەك من كاركر ژبۆ هندێ مۆزیكێ نیشا گەنجان بدەم، ئەو بوو من ل چەندین رێكخراوێن ناڤخوەی ئەڤ كارە ئەنجام دا، بۆ هندێ بشێم ئەو بەهرەیا من هەی نیشا حەزژێكرێن مۆزیكێ بدەم، ل ڤێرە ئەز نە راوەستیام من هزر دهندێ دە كر ب رێكا كۆمەكا هەڤالێن خودان شیان د بوارێ سترانگۆتنێ و مۆزیكێ دا مە گرۆپەك ب ناڤێ (یەزدا مۆزیك) دامەزراند، ژبۆ هندێ بڤێ رێكێ ئەم بشێن كلتۆر و ستران و مۆزیكا خوە ب پارێزین و ئەم وەكو گەنجێن كورد خودانێن هیڤی و ئارمانج و شیانێن مەزنن د بوارێ جودا جودا یێن ژیانێ دا، نە خاسمە مۆزیك زمانەكێ جیهانی یێ بێدەنگە مرۆڤ دشێت ب ئازادی پەیاما خوە یا راستەقینە بگەهینیت.
