نابیت بابەتێن گرێدایی خێزانێ ل سۆشیال میدیایێ بهێنە بەلاڤكرن
هەولێر، قائید میرۆ:
مامۆستایەكا زانكۆیێ بۆ روژناما ئەڤرۆ دیار كر كو بەرفرەهبوونا میدیایێ و سۆشیال میدیایێ كاریگەریێن راستەوخۆ ل سەر جڤاكی پەیدا كرینە و باوەری دناڤ جڤاكی دا نەمایە و گۆت: نابیت ئاریشەیێن خێزانی و كەسی ل راگەهاندنێ و سۆشیال میدیایێ بهێنە بەلاڤكرن و دڤێت پیرۆزیا خێزانێ بهێتە پاراستن.
ئاشنا بابان، مامۆستایا زانكۆیێ دیار كر كو راگەهاندنێ ب هەموو ئالاڤێن خۆڤە كاریگەریێن راستەوخۆ ل سەر جڤاكی هەنە و سۆشیال میدیایێ كاریگەریەكا زۆر پەیدا كریە ل سەر ژیانا هەموو مرۆڤان، بتایبەتی ل هەرێما كوردستانێ پڕانیا خەلكی گرێداینە ب راگەهاندنێ و سۆشیال میدیایێ ڤە ب گشتی و گوت: (هەكە سانسۆرەك نەبیت هەموو بابەتێن ئەرێنی ژی دێ ب نەرێنی هێنە بەلاڤكرن، بەری نوكە دابێژن ئەركێ راگەهاندنێ گەهاندنا زانیاریانە، بەلێ نوكە راگەهاندن یا دهێتە ئاراستە كرن، ئەركێ راگەهاندنێ تنێ گەهاندنا زانیاریان نینە، بەلكو ئەف شۆڕەشا تەكنەلۆژیایێ یا بەربەلاڤ جیهان كریە گوندەكێ بچووك).
ماكوستایا زانكویێ گۆتژی: (لەوڕا پێدڤیە تاكێن جڤاكی ب هشیاری سەرەدەریێ ل گەل راگەهاندنێ بكەن، هشیاری زۆر یا گرنگە بۆ ژێرخانا هزری و یا نەتەوەیی، مخابن ژبەر بێ سەرۆبەریا نوكە ل میدیایێ هەی باوەری نەمایە، پارێزگاریا خێزانێ زۆر یا گرنگە د كەڤندا دا بێژن هەكە ئاریشەیەك دناڤبەرا هەڤژینان هەبوو بلا نەچیتە دەرڤەی مال و كەس نەزانیت، لێ نها مخابن ئاریشەیێن دناڤ خێزانێ و دناڤبەرا هەڤژینان دا ژی ل سەر دەزگەهێن راگەهاندنێ و سۆشیال میدیایێ دهێنە بەلاڤكرن بۆ پەیداكرنا بینەر و خوینەرا بابەتێن زۆر مەترسیدار دهێنە بەلاڤكرن، نابیت بۆ پەیداكرنا كۆمێنت و لایكا هندەك بابەتێن خێزانی و كەسی بكەڤنە دناڤا راگەهاندنێ و سۆشیال میدیایێ).
ئاشنایێ د بەردەوامیا ئاخفتنێن خۆدا دیار كر كو خێزان بنەمایێ هەموو جڤاكەكی یە و پێدڤی ناكەت هەموو ئاریشە ب رێیا راگەهاندنێ بهێنە بەلاڤكرن چەندین نموونە هەنە ژن و زەلام جودا بووینە و ل سەر دەزگەهێن راگەهاندنێ بەحسێ ئەگەرێن تەلاقێ دهێتە كرن ددەمەكی دا تەلاق و ژێكڤەبوونا ژن و مێران بابەتەكێ زۆر هەستیار و تایبەتە و گۆت: (چونكە ئەڤە دێ بیتە هاندەر بۆ كەسێن گەنج ئەوژی چاڤلێكرنێ بكەن و تەلاقێ وەربگرن و خێزان بهێنە تێكدان، هندەك شاشیێن دی هەنە بتایبەتی د تۆڕێن جڤاكی دا وەكی تیك تۆكی خەلكەكێ دانعەمر هەموو ژیانا خوە نیشا خەلكی ددەت و هەتا دەمێ خوارن و ڤەخوارنێ ب راستەوخۆ دهێتە ڤەگوهاستن ئەوژی تنێ بۆ پەیداكرنا جەماوەری یە).
ماموستایا زانكویێ ئاشنایێ دا زانین ژی كو د پڕانیا جڤاكێن جیهانێ دا كەسێن دانعەمر بووینە قوتابخانە بۆ جڤاكی و ئەزموونا وان یا دەولەمەند دبیتە نموونە بۆ گەنج و كەسێن تەمەنێ وان كێم، بەربەلاڤیا سۆشیال میدیایێ كاریگەری ل سەر ژیانا خێزانێ و هەڤژینان هەیە، چونكە زۆربەیا بادەكێن تەلاقێ یێن وان گەنج و هەڤژینانن یێن پشتی سالا 2000 پەیدا بووی یان نوكە چووینە دناڤا پرۆسا هەڤژینیێ دا و خێزان پێك ئینای و گۆت: (ئەڤجا دڤێت قانوون وەكی خۆ بهێتە بجهئینان و سانسۆرەك ل سەر تۆڕێن جڤاكی و میدیایێ هەبیت، ژبەركو نەبوونا چاڤدێرییێ دێ بیتە ئەگەر سال بۆ سالێ ئاریشەیێن د ناڤا جڤاكی دا زێدەتر ببن و مەترسیێن بكارئینانا سۆشیال میدیایێ دێ زێدە بن).
