نابیت شووفێر مافی بدەتە خوە هەموو پرسیاران ژ نەفەران بكەت
ئەڤرۆ
هەرهین محەمەد:
تەكسی ترومبێلەكا گشتیە و هەموو كەس پێدڤی دبنێ، لێ جاران نەفەر دەمێ سیار دبن بتایبەت ئافرەت نەخوشیا خوە ژ ئاخفتن و پرسیارێن شوفێرێ تەكسیێ دبنن و ئەڤە دیاردەكا نەجوانە و پێدڤیە شوفێر ب ئەتەكێت و ئەمانەت كارێ خوە بكەت.
بەیار رەمەزان، ماموستایە ل قوتابخانا هەڤوت دیار كر، ئەڤ دیاردە یا كەڤنە د هەموو جڤاكا دا هەیە، نەك بتنێ د جڤاكێ كوردی دا و دهێتە هژمارتن ژ دیاردێن نەجوان و ئەڤ چەندە یا رێژەیی یە و هەموو شوفێر پرسیار و سوحبەتان ناكەن.
بەلێ هندەك شوفێر ژی هەنە گەلەك پرسیارا نەفەری دكەن یان زور ل گەل دئاخڤن و نەفەر نەخوشیا ژ ڤێ چەندێ دبینیت و ئەڤ دیاردە ب چو رەنگان ناهێتە بنبڕ كرن و گۆت: (بەلێ چارەسەری ژ بۆ ڤێ چەندێ هەنە و یا گرنگە هەر مالەكێ شوفێرێ خوە یێ تایبەت هەبیت).
رۆژنامەڤان بەختیار بیركیاتی گۆت: (ئەم جڤاكەكێ مایتێكەرین و نەك بتنێ شوفێرێن تەكسیان پرسیاران ژ ژنان دكەن و ل گەل دكەڤنە سوحبەتێ، بەلكو ل گەل زەلامان ژی دكەڤنە سوحبەتێ و پرسیاران دكەن دێ هزر كەی سیڤیەكی دێ بۆ مرۆڤی چێكەن و پرسیار هەنە گەلەك د تایبەتن نابیت بهێنە كرن).
بەختیار ئەو چەندە ژی دیار كر ئەڤجا هەكە ژن و كچ ل تەكسیێ سیار بن و پرسیار ژێ بهێنە كرن بێگومان دێ بێزاریا خوە ژێ بینن، پەیوەندیا شوفێری و ئەو كەسێ ل تەكسیێ سیار دبیت بتنێ ئەوە وی جهێ دڤێت شوفێر بگەهینت و بهایی وی بدەتێ و گۆت: (ئەو كەسێ ل تەكسیێ سیار دبیت نەیێ نەچارە بەرسڤا هەموو پرسیارێن شوفێرێ تەكسیێ بدەت و ئەڤە دیاردەكا نەجوانە ل دەڤ هندەك شوفێران).
سەبارەت هەمان بایەت ژیان سەلاح، چارەسەركارا دەرونی دیار كر كو گەلەك جاران دەمێ ژن دچیتە د تەكسیێ دا، شوفێرێ تەكسیێ دێ ل گەل ئاخڤیت و مافی ددەنە خوە هەموو پرسیاران دكەن و گەلەك ژنێ ددەنە شەرمێ ب و گۆت: (80% ژ خەلكی تایبەت ژن نەشێن ل گەل هەر تەكسیەكێ سیار ببن، لەوا بخوە تەكسیا ئێكێ نیاس و باوەریێ گرتیە و كو ل گەل هاتن و چوونێ بكەن، چونكو باوەری نەمایە، راستە پتریا مالا تورمبێل هەنە، بەلێ هەر مرۆڤ پێدڤی تەكسیان دبیت).
ژیانێ گۆتژی: (نابیت هەموو كەسان ماف هەبیت تەكسیێ ب هاژون بەلكو دڤێت خودانێ تەكسیێ باجەك هەبیت داكو بهێتە نیاسن خودانێ تەكسیێ یە و ژمارا تێلەفونا وی یا دیار بیت ل جهێن پەیوەندیدار و لوگو ژی ل سەر تەكسیێ بیت) .
