نابیت مە پێدڤی ب بەرهەمەكی هەبیت و حوكمەت ڤرێكەتە دەرڤەی وەلاتی
هەرهین محەمەد:
بسپورەكێ د بیاڤێ ئابوری دا دەتە دیاركرن كو چاندنا هەر بەرهەمەكی یێ زێدە بیت د بازری دا و بمینیتە ل سەر گوهێن جوتیاری و ب هەدر بچیت نەخەلەتیا جوتیاری یە، بەلكو یا پێدڤیە حوكمەت هەڤسەنگیێ چێكەت د بەرهەمان دا و هەر بەرهەمەكێ ژ هەرێمێ زێدەكەت بهنێریتە بازارێ ژ دەرڤە ب ئەڤێ چەندێ حكومەت و جوتیار دێ دمفاداربن.
بەیار ئەحمەد، مامۆستا و بسپور د وارێ ئابوری دا دبێژیت: هەر بەرهەمەكێ بچیتە دەرڤەی وەلاتی دبێژنێ هنارتی و گەلەك مفا هەنە وەكو باجێن گۆمركی و هەردیسان هنارتنا بەرهەمی داهاتەكە بۆ جوتیاری دزڤریت، بەلێ دڤێت هەڤسەنگی هەبیت دناڤبەرا هنارتی و ئینان دی یا، چونكو تشتەكێ هەی دبێژنێ قازانج.
زێدەتر گۆت: ل پارێزگەها دهۆكێ پێدڤی هزار تەنێن باجان سوركانە و هەكە زێدەی مە كرن گەلەك یا پێدڤیە ئەم سەحەینە بازارەكی و ئەوان باجان سوركان رەوانە بكەینە ژ دەرڤە و هەكە نەهاتە رەوانەكرن بۆ دەرڤەی وەلاتی دبیت ئەو باجان سوركە هەموو ب هەدر بچن، بەلێ هەكە ئەم پێدڤی هزار تەنێن باجان سوركان بین و ئەوان باجان سوركان رەوانە بكەینە دەرڤەی وەلاتی، چونكو دێ كێماتیا بەرهەمی چێبیت د ناڤ بازاری دا و دێ ئەو بەرهەمە گران بیت ل سەر خەلكی.
خویاژی كر، دڤێت هەموو دەمان جوتیار و جهێن پەیوەندیدار هەڤسەنگیەكێ بكەت دناڤبەرا هنارتی و ئینان دی یان و نوكە تەكنولوژیا یا پێشكەفتی و وەكو بەرێ نەمایە ب تنێ بەرهەمەك ب تنێ ل وەرزەكی بهێتە چاندن و نوكە ب رێیا تەكنەلوژیایێ دشێی هەر چوار وەرزێن سالێ بەرهەمێ خوە ب چینی.
بەیار ئەحمەد، مامۆستا و بسپور د وارێ ئابوری دا دیار كر، ئەگەر ئەم ب تنێ ب هیڤیا بەرهەمێ باجانان ڤە باین ل وەرزێ هاڤینێ دبیت ل وەرزێ زڤستانێ مە باجان سورك كیلو ب هەشت هزاران ژی نەكری با، بەلێ نوكە هەربەرهەمەكێ هەبیت ل بن لایلونان دهێتە چاندن ب بهایەكێ ئەرزان دهێتە فرۆتن و د نوكە دا نەشێن بێژین ئەڤ وەرزە یێ فلان بەرهەمی یە و پێدڤیە ئەو بتنێ بهێتە چاندن، ژبەركو بازارێ ئەڤرۆكە وەسا ناخوازیت
ناڤهاتی هێشتا ژی گۆت: د سالەكێ دا وەلاتێ توركی پتات هنارتە د بازارێ مە دا و كەسێ كیلویا پتانان ب روبعەكێ ژی نەدكری و گەلەك یا مشەبوو و سالا ل دووڤدا جوتیارێ مە ژ ترسێن هاتنا پتاتان ژ دەرڤەی وەلاتی ئەوێ سالێ پتات نەچاندن و وەلاتی توركیا ئەوی سالێ پتات چاندن و ل دەڤ مە پتات گران بوون و دبێژنە ڤێ چەندێ سیاسەتێن رامیاری یێن ئابووری و گەلەك یا پێدڤی یە حكومەت جێبەجێ بكەت و دشێت ب رێیا گومركی جێبەجێ كەت و دەولەتێ دو رێك هەنە داهات بۆ ئەوان ب زڤریت وەكو باجێن گومركی و هنارتی و ئەڤ چەندە دێ بیتە داهاتەك بۆ حكومەتێ و هەردیسان دێ بیتە داهاتەك بۆ جوتیاران ژی.
بەیار ئەحمەد، مامۆستا و بسپور د وارێ ئابوری دا دا زانین ژی، دیسان دێ بێژم دڤێت خالا هەڤسەنگیێ ژبیرنەكەین و نابیت خەلكێ مە یێ پێدڤی بیت و ئەم بهێنێرینە دەرڤەی وەلاتی و راستە دێ داهات بۆ حكومەتێ هێت، بەلێ دێ گرانی كەڤیتە بازاری د وی بەرهەمی دا و جوتیار هەردێ كارێ خوە كەت و یا دی دمینتە سەر ملێن حكومەتێ وجهێن شولەژی ئەوێ هەڤسەنگیێ بكەن، یان دەمێ دزانن وەرزێ بەرهەمێ مەیە و رێگریێ ل بەرهەمێ ژدەرڤە بكەن و نەهێتە دناڤ بازارێ هەرێمێ دا، داكو كارتێكرنێ ل جوتیارێ مە نەهێتە كرن و هەردیسان حكومەت هاریكاریا جوتیاری ژی بكەت كەلوپەلێن چاندنێ بۆ دابین بكەن ب بهایەكێ ئەرزان و هەردیسان توڤەكێ باش ژی ب دانە بەردەستێ ئەوان دا كو ئەو چاندنا خوە بكەن وەسا ب ئەڤێ رێكێ حكومەت و جوتیار و خەلك ژی دێ د مفاداربن.
