نابیت هیڤیێن خۆ بێخینە ژێر كارتێكرنا خەلكی
بێوار حەمدی:
پێدڤیە خواست و هیڤیێن خۆ ل بەرچاڤ وەربگرین و پاراستنا ئەرك و مافێن خوە بكەین و بۆ بەرژەوەندیێن خۆ كار بكەین، چالاكڤانەكا جڤاكی ژی گۆت: نابیت رازیكرنا خەلكی هند یا گرنگ بیت كو ببیتە ئەگەر خواست و هیڤیێن مە بكەڤنە ژێر كارتێكرنا وان و بەرژەوەندیێن وان.
چیان مەهدی، چالاكڤانا جڤاكی یە د دیدارەكێ دا بۆ رۆژناما ئەڤرۆ دیار كر كو مللەتێ كورد ب گشتی زوی ب زوی دكەڤیتە بن هەست و سۆزێن خەلكی و ئێش و ئازارێن خۆ زوی ژبیر دكەین و د ئامادەینە كچێن خۆ بكەینە قوربانی كۆڕێن خەلكی، ژبەر هندێ ژی ژ ئارمانجێن خۆە دوور دكەڤین و گۆت: (ئەڤ چەندە ژ نەزانینا مە نینە، بەلكۆ ئەم زێدەتر ژ یا پێدڤی رێزێ ل بەرامبەری خۆ دگرین و بێی مە چ داخوازی ژی هەبن).
چیانێ د بەردەوامیا ئاخفتنێن خودا دیار كر كو نابیت رازیكرنا خەلكی هند یا گرنگ بیت كۆ وەبكەت خۆاست و هیڤیێن مە بكەڤنە ژێر كارتێكرنا وان و رازیكرنا وان و گۆت: (ئەو كەسێن ژبۆ رازیكرنا خەلكی دژین هەموو بها و تایبەتمەندیێن خۆ ژ دەست ددەن و زێدەتر ژ ماندیبونێ چ تشتەكی ب دەستڤە نائینن و ماف و ئەركێن خۆ ژی بەرامبەر خۆاستێن خۆ ژ دەست ددەن.
چالاكڤانا جڤاكی، ئەو چەندە ژی دا زانین، پێدڤیە خواست و ئارمانجێن خۆ ل بەرچاڤ وەربگرین و پێداگیریێ ل هیڤی و ئومێدێن خو بكەین، نورمالە هەتا كو سنورەكی بو بەرژەوەندیێن خەلكی ژی بەرچاڤ وەربگرین و گۆت: (بەلێ نابیت بۆ هیچ دەمەكی بكەڤینە لژێر كارتێكرنێن دەوروبەرا و نابیت ل سەر كیستێ بەرژەوەندیان بیت بەلكۆ پێدڤیە بۆ بەرژەوەندیێن خۆ كار بكەین بێی كۆ خۆ بكەینە پرەك و قوربانیەك ژ بۆ خەلكەكێ دی).
