ناحیا دێرەلۆکێ پێدڤی ب تیمەکا نقومڤانایە
ئه‌ڤرۆ نيوز:
زێدەباری نوکە چەندی جھێن گەشتیاری یێن نوو و مەلەڤانگەھێن سروشتی لێ ھاتینە دروست کرن و سەنتەرێ ناحیا دێرەلۆک دکەڤیتە ناڤبەرا سێ رووباران دا، لێ ھەتا نوکە چو تیمێن نقومڤان لێ نینن.
شەوکەت خەلیل ئاکنجیێ سەنتەرێ ناحیا دێرەلۆک دیارکر، ھەبوونا تیمەکا نقومڤان ل دەڤەرێ ئێک ژ پێدڤیاتێن گرنگە، ژ بەر کو دێرەلۆک دکەڤیتە سەر سێ رووبارا زێدەباری نوکە چەندین جھێن گوزاری دروست کرن و گۆت: (ئەڤە ل ھندی من بیرە دبێژن دێ پارکەکێ ل دێرەلۆکێ چێکەن لێ تا نھا چ دیار نینە، زارۆیێن مە ژ بەر نەبوونا باخچە و پارکا دچنە جھێن دیتر یان ژی دچنە سەر ئاڤا زێ و خوە دئیخنە ئاڤێ ئەڤێ یەکێ ژی مەترسی ل سەر ژیانا زارۆیێن مە دروستکریە، ژ بەر نەبوونا نقومڤانان ژی مەترسی مەزنتر لێَ دھێت).
ئیحسان سەنعان بەرپرسێ بنگەھێ بەرەڤانیا باژێری ل دێرەلۆکێ بۆ رۆژناما ئەڤرۆ دیار کر، وان ل بنگەھی تیما نقومڤان نینە و گۆت: ( ھەکە تیمەکا نقومڤان ل دێرەلۆکێ ھەبایە دا باشتر بیت، ژ بەر کو سێ رووبار ل دەڤەرێ ھەنە و سالانە قوربانی لێ دروست دبن).
و دیار کر، بەری نوکە ژی ب رێیا رێڤەبەریا ناحیا دێرەلۆک داخوازیەک بلند کربوو کو تیمەکا نقوماڤان ل دێرەلۆکێ بھێـتە دامەزراندن، بەلێ ژ بەر نەبوونا دامەزراندنێ و ھەروەسا رەوشا ئابوری یا ھەرێمێ نەشیانە ئەڤ کاری بھێتە کرن.
سامی ئوشانە رێڤەبەرێ ناحیا دێرەلۆک بۆ ئەڤرۆ دیارکر، ژلایێ خوە ڤە وان ژی لایەنێن پەیوەندیدار ئاگەھدار کرینە، لێ ژ بەر قەیرانێ ھەتا نوکە چو تیمێن نقومڤان ل دەڤەرێ نەھاتیە دامەزراندن و گۆت: مە بزاڤ کرینە پارکەک ل دەڤەرێ بھێتە ڤەکرن و نوکە ڤەدیتن ژی ھاتینە کرن و ھاتیە بلند کرن، بەلێ رازیبوون ل سەر نەھاتیە کرن.
