ناخێ بەرزەبوویی
سەگڤان ئیسماعیل
نە گونجاندنا دەمی دگەل ئارمانجان، ئەو ب خوە شکەستنەکا چاڤەرێکرییە د ناڤا جیهانا هەستکرنێ دا. بتنێ بەسە ببیتە وەغەرەکا ڕەشە ڕەنگ، هەر وەکی هندێ یە وەک ڤەهاندنا کەزییانە بەر تاڤە هەیڤێ، ئەو ب خوە ژی وەکی وەغەرەکا ئاڤا بوویە ژ خوەشیێ و گەشتەکا پری سەر ئەڤرازییە بۆ گەهشتنا هەر هیڤیەکا ڕاستەقینە و ڕەوا.
ئەو دەمەکێ گەلەك درێژ بوو بۆ ئەوان هەستێن بەرزە د ناخێ خوە دا د گەڕیا. ئەو چەند ڕۆژ بوون د ژیانێدا کەسێ های ژێ نەبوو، ئەوێ ژی های ژ کەسێ نەبوو د بازنەییەکا بێ داویدا ، دژییا، شەڤ بۆ شەڤێ و ڕۆژ بۆ ڕۆژێ ئەڤ چەندە دوبارە دبوو بێ کو هیچ چارەیەك بۆ بهێتە دیتن. لێ هەردەم خوە ل ئەلندا ڕۆژێ دگرت و هەمی هیڤیێن خوە ڕاچاندن بۆ ئەوێ هیڤییا هێشتا ژ دایك نە بوویی. پشتی نەچار بوویی هەست ب هەبوونا خوە نەکری و ئالودەبوونا خوە دگەل ئەوان هیڤیێن دەم بسەرڤەچوویی ڕاچاند، ژ نیشکەکێڤە هزرەکا دۆزەخی هاتە بیرێ و دەنگەکێ هێدی هاتە گوهی و گۆتێ: هەرە ژ دەرڤە و بەر ڕۆناهییا تاڤە هەیڤێ و هێدی هێدی هەمی ستێران ئێك ب ئێکە ب هەژمێرە؛ دا بگەهییە خوەشییا خوە یا ڤەشارتی و ئاشکرا، و دێ فالکا تە ڤە بیت. ئەڤ چەندە بۆ گەلەك جاران دوبارە بوو. ئەڤ چەندە وەك هێما هاتە پەژراندن د ناڤا شەڤەکا تاری گرتیدا د هاتە لڤاندن. ئەڤ لڤاندنا هەستان هەر کار دکر و دوبارە دبوو.
بێ ئێک و دو، دەستێ خوە هاڤێتە دەرگەهی و دەرگەھ ڤەکر، بەرەڤ چوونا ژ دەرڤە ڕێکەڤت و بەرێ خوە دا ئاسمانێ پان و مەزن و دەست ب کارێ خوە کر، ژ نیشکەکێڤە ئاسمان بەرەڤ ڕەشاتیێ ڤە چوو و هەیڤێ بێ دودلی خوە ڤەشارت و زیز بوو و چوو پشت عەوران و خوە ڤەشارت. ئێکسەر بێهودەبوونا خاتینا بەژن بلند گەهشتە كۆپیتکا ئاڤابوونێ، ڕۆندك و ئاخینکێن گولبهارێ عەرد و ڕوبار کرنە دەریا و هەمی بیابان پێ هاتنە ئاڤدان.
چەند ژ دەمی چوو، ئاسمانی ڕەشاتییا خوە ڕەڤاند و چاڤێن خوە ڤەکرن و تیشکێن ڕۆژێ بەدەنێ ئەوێ داگیرکر و هەست ب هەبوونا خوە یا بهێزکر، هەر وەکی دارا بەروییێ خوەڕاگرییا خوە هەلداڤە.
پیرەکا دەقدایی سەرێ ئەوێ ژ سەرێ تاخی هاتەدەر و پێکۆلکر بگەهیتە گولبهارێ؛ لێ ڕەنگێ هەیڤا چاردە شەڤی هەلاتنا خوە یا ژ دەستدایی. لێ پیرەکا دەقدایی دەڤێ خوە هێدی دا بەر گوهێ ئەوێ و گۆتێ: ڕابە هەیڤا نووهەلاتی، ژ ئەڤرۆ پێڤە ژیان هەمی بۆ تە ڤەکرییە. ڕابە ژ ناخێ خوە یێ بەرزەبوویی.
