نارین فه‌قێ: هه‌موو ده‌مان بزاڤان دكه‌م هونه‌ره‌كێ نوو و جوان پێشكێشی گه‌لێ خوه بكه‌م
ئه‌ڤرۆ،زنار تۆڤی:
خانما سترانبێژ نارین فه‌قێ، خه‌لكا رۆژئاڤایێ كوردستانێ یه و نوكه ل وه‌لاتێ سوید دژیت، د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیار كر: نووترین به‌رهه‌مێ وێ پاییزا خه‌ونان بوویه، وێ ئه‌ڤ به‌رهه‌مه ب هه‌لكه‌فتا ده‌ربازبوونا 20 سالان ل سه‌ر كارێ وێ د وارێ هونه‌ری دا چێكریه، په‌یڤێن وێ هه‌لبه‌ستێ یێن هه‌لبه‌ستڤان ئه‌دیب چه‌لكی بووینه، ئاوازا ڤێ سترانێ یا مۆزیكژه‌نێ نه‌مر زاهد بریفكانی بوویه، كو به‌ری ئه‌و وه‌غه‌ر بكه‌ت، وی ئه‌ڤ ئاوازه پێشكێشی وێ كربوو وێ ژی ئه‌ڤ سترانا خوه یا نوو دیاری گیانێ وی كریه، كارێ دابه‌شكرنا مۆزیكێ ژ ئالیێ هه‌ڤژینێ وێ یێ موزیكژه‌ن عه‌لی شاكری ڤه هاتیه كرن، ئه‌ڤ سترانه ل وه‌لاتێ سوید و ل گه‌ل گرۆپێ كه‌مانێ و ساكسیفۆنێ ل باكوورێ كوردستانێ و هه‌روه‌سا كارێ میكس و ماسترینگێ ل تۆن ستۆدیۆ ل باژێرێ دهۆكێ هاتیه تۆماركرن، هونه‌رمه‌ند و ده‌رهێنه‌ر (هه‌ژار دهۆكی) ب كارێ كلیپكرنا ڤێ سترانێ رابوویه، ئه‌ڤ سترانه ل باكوورێ كوردستانێ و وه‌لاتێ سوید هاتیه وێنه‌كرن.
ناڤهاتیێ ئه‌و ژی گۆت: ده‌مێ ئه‌ز ل سه‌ر به‌هه‌مه‌كی كار دكه‌م ئارمانجا من ئه‌وه، په‌یڤ و ئاوازێن جوانن كو دگه‌ل ئێك ب گونجن، هه‌م وه‌كو ستران و هه‌م ژی وه‌كو كلیپ دروست بكه‌م و به‌لاڤ بكه‌م، ژ پێخه‌مه‌ت خه‌لكێ مه گوهداریا سترانێن خۆش بكه‌ن، دیسان هه‌موو ده‌مان ئه‌ز بزاڤان دكه‌م، هونه‌ره‌كێ نوو و جوان پێشكێشی گه‌لێ خوه بكه‌م، هه‌روه‌سا د نوكه دا جیهانا مۆزیكێ هه‌موو گرنگییێ دده‌نه به‌رهه‌مێن دیجیتال، له‌وما ئه‌ز دبینم باشتره كو ئه‌ز به‌رهه‌مێن سینگل دروست بكه‌م و كلیپ بكه‌م، دیسان هه‌ر سال ئه‌ز سترانه‌كێ یان دو سترانان به‌لاڤ دكه‌م، هه‌ر چه‌نده چێكرنا ئه‌لبۆمێن سترانان ژی كاره‌كێ باشه، لێ مخابن، ئێدی ل دووڤ حه‌زا مه ئه‌لبۆمێن مه ل بازاری ناهێنه فرۆتن، هه‌موو تشت بووینه دیجیتال، له‌وما نوكه كلیپێ پتر رۆلێ خوه دناڤا خه‌لكی دا هه‌یه، ب تایبه‌تی ژی ل سه‌ر كه‌نالێن ته‌له‌ڤزیۆنی و ل سۆشیال میدیایێ ژی.
نارین هێشتا دبێژیت: د ده‌مێ ڤان 20 سالێن بوری دا، ئه‌و كار و خه‌باتێن من ل سه‌ر به‌رهه‌مێن خوه كرین، من هزر د هندێ دا كریه، كو ئه‌ز ب باشترین وان سترانان بێژم و هه‌رده‌م ئارمانجا من ئه‌وه، ئه‌ز كارێن خوه‌ش و نوو پێشكێشی خه‌لكێ كوردستانێ بكه‌م، هه‌روه‌سا ئه‌ز ژ هه‌موو كارێن خوه یا رازیمه، د ئه‌ڤان 20 سالێن بوری دا، من سێ ئه‌لبۆمێن سترانان چێكرینه، هه‌روه‌سا من 12 سترانێن سینگل ژی چێكرینه و هه‌موو ژی من كلیپ كرینه، د هه‌مان ده‌ما من سێ سترانێن دویت ژی گۆتینه، دویته‌ك من ل گه‌ل هونه‌رمه‌ند حه‌سه‌ن غه‌فۆری و ئێك ژی ل گه‌ل بابێ خوه و یا دیتر ژی ل گه‌ل هونه‌رمه‌ند هه‌ڤال ئیبراهیمی گۆتیه.
ناڤهاتیێ ئه‌و چه‌ند ژی گۆت: نوكه چه‌ندین به‌رهه‌مێن نوو ل به‌ر ده‌ستێ من هه‌نه، ئه‌ز یا بزاڤان دكه‌م، ب ستایل و ئامیرێن كوردی پتر گرنگیێ دده‌مه مۆزیكا كوردی، دێ پتر خزمه‌تا هونه‌رێ كوردی كه‌م، هه‌روه‌سا ئه‌ڤه 20 سالێن من د وارێ هونه‌ری دا ده‌رباز بوون، من هه‌رده‌م ڤییایه ب رێیا هونه‌رێ خوه دلێ ملله‌تێ خوه خۆش بكه‌م، بۆ سالا داهاتی ژی، ب ئاوازێن خۆش یێن كوردی ب هه‌لبه‌ستێن باش دێ هنده‌ك كارێن نوو ئه‌نجام ده‌م، دیسان ئه‌ز بزاڤان دكه‌م، ل سه‌ر ئاستێ جیهانی ژی مۆزیكا كوردی به‌ر ب پێشڤه ببه‌م، هه‌رده‌م ئه‌ڤه ئێك بوویه ژ حه‌ز و هیڤیێن من د وارێ هونه‌ری دا، دیسان ب ره‌نگه‌كێ به‌رده‌وام ئه‌ز گۆهدارییا سترانێن محه‌مه‌د عارفێ جزیری و حه‌سه‌نێ جزیری و ته‌حسین تاهایی و محه‌مه‌د شێخۆیی مریه‌م خانێ و عه‌یشه شانێ و چه‌ندین ده‌نگبێژان ژی دكه‌م.
نارین هێشتا دبێژیت: د ئه‌ڤان 20 سالێن بوری دا، من هه‌موو هێز و گرنگییا خوه دایه هه‌لبه‌ست و ئاوازێ، دیسان من گه‌له‌ك گرنگی ب په‌یامێ ژی دایه، من ستران بۆ زمانێ كوردی و ژنا كورد و پاراستنا موزیكا كوردی گۆتینه، ئارمانجا من ئه‌و بوویه، كو ئه‌ز خزمه‌تا هونه‌رێ كوردی یێ ره‌سه‌ن بكه‌م، دیسان ئه‌ز دبێژنه سترانبێژێن گه‌نجن ده‌مێ هوون كاره‌كێ هونه‌ری به‌لاڤ دكه‌ن، هزر ل هندێ بكه‌ن، كانێ هوون دێ چ په‌یام به‌لاڤ كه‌ن، چونكی به‌لاڤكرنا په‌یامێ گه‌له‌ك گرنگییا خوه د وارێ هونه‌ری دا هه‌یه، دیسان یا گرنگه، هه‌لبه‌ست و ئاواز ب هه‌ڤرا د گۆنجایی بن، هه‌روه‌سا دڤێت هونه‌رمه‌ند هونه‌ره‌كێ پاقژ و ره‌سه‌ن پێشكێشی خه‌لكێ كوردستانێ بكه‌ن.
ل دووماهیێ ئه‌و ژی ئاشكرا كر: گه‌له‌ك ئاسته‌نگی ل پێشیا هونه‌رمه‌ندان هه‌نه، چێكرنا كارێن هونه‌ری ب زه‌حمه‌تن، د هه‌موو واران دا ئه‌و ئاستنگیان دبینین، ب تایبه‌تی ژی هونه‌رمه‌ندێن وه‌كو من یێن كو ل ده‌رڤه‌ی كوردستانێ دژین، دیسان مرۆڤ حه‌ز بكه‌ت یان حه‌ز نه‌كه‌ت، ئورۆپا ژ بۆ كارێن هونه‌ری جهه‌كێ ساره، لێ ل كوردستانێ گه‌رماتییه‌ك هه‌یه، هه‌رده‌م حه‌زا ڤه‌گه‌ریانێ بۆ وه‌لاتی د دلێ من دا هه‌یه، دیسان ل ئورۆپا ئاسته‌نگی د وارێ په‌یوه‌ندییان و كۆنسێرتان دا هه‌نه، هه‌روه‌سا ده‌مێ ئه‌م به‌رهه‌مه‌كێ چێدكه‌ین، سپۆنسه‌ری پێ دڤێت، دیسان ئاسته‌نگێن مادی ل پێشییا هه‌موو ژنێن كورد هه‌نه، له‌وما دخوازم كو حوكمه‌تا كوردستانێ پتر گرنگیێ ب كۆنسێرتێن پرۆفیشنال بده‌ت، ژ پێخه‌مه‌ت هونه‌رمه‌ند ژی بشێن ب هونه‌رێ خوه بژین، د هه‌مان دا د نوكه دا موزیكا كوردی یا به‌ره‌ف لاوازبوونێ ڤه دچیت، له‌وما حه‌ز دكه‌م، هونه‌رمه‌ندێن مه پتر گرنگییێ ب هونه‌رێ كوردی یێ ره‌سه‌ن بده‌ن.
