نارین
ژینێ رێكانی
ل گرێ هنداڤ مالا مە
خوناڤا تاڤزەرەكا
ژ چیای خاركەفتی
بێهنا همبێزا تە
سەما دگەل پێلێن بای دكر
پاخلێن من تژی شعر دكر
شەهمارێ پێلێن هارێ “زێی”
وەك رەقیبان
خوە كار دكر
گرنژینێن
خەون و هیڤی و هەستێن من
ل حزوورا
بەكۆیێن ڤی شارێ
دلێ وی كەڤر
رۆژێ پێنج جار
گرنژینا سەر لێڤێن پەریا
ل بەر دەرێ
مزگەفتێ
سێدارە دەن
من عەشق قیبلەیە
لالشەكا دپاخلا من دا
موهرا سورمیخانێ
لناڤ پێچایە
ستڤانكەكێ ژ ستێرا
خەملاندی بگەردەنا منڤە
بەر هەر ل رۆژێ و سەمایا دلایە
سترانێن عەشق و ئازادیێ
دگەل پێلێن شەهمارێن ڤی “زێی”
ژ عەشق هێلانا ڤی باژێری حەمەر بووی
ئاشنا دكەن
ل دەرازینكێن
خەونێن ژ هیڤیا كویڤی بووین
شەڤ ب ستێرێن
هیڤییێن منڤە
سەمایێ دكەن
ل گرێ هنداڤ مالا مە
تاڤزەرەكا خوناڤ گرتی
هەر ئێڤارەكێ
هەپارێ تە
ل هەمبێزا خۆ
ژ پێلێن رویباری ددزیتن
بۆ خوە دبەتن.
