ناسناما فرۆکەڤانێ روسی یێ ھاتیە کوشتن ئاشکرا بوو
ئەڤرۆ نیوز، ئەیاد بەرواری:
ناسناما فرۆکەڤانێ روسی ئەوێ د روودانا ئێخستنا فرۆکا روسی دا ل سووریێ ژلایێ فرۆکێن تورکی ڤە، ل تۆرێن جڤاکی ل روسیا ھاتە ئاشکراکرن.
ل دووڤ سایتێ (روسیا الیوم)، ھندەک چالاکڤانێن تۆرێن جڤاکی ل روسیا پشتی دووڤچوونەکا ھوور دیاربوو کو ئەو فرۆکەڤانێ ھاتیە کوشتن کو فەرماندێ فرۆکا (سوخۆی – ٢٤) بوو و ناڤێ وی ( سیرغی رومیانتسیف) ژ باژێرێ (تشیلیابینسک) یێ روسی یە.
ھەتا نوکە روسیا ب شێوەکێ فەرمی بەحسێ کوشتنا فرۆکەڤانێ خوە نەکریە و وەزارەتا بەرگریا روسی راگەھاندبوو کو ئەو بزاڤا وەگرتنا پێزانینان ل سەر چارەنڤیسێ ھەردو فرۆکەڤانێن روسی و ئەگەرێن وێ روودانێ دکەت.