ناسنامەیێن 39 روفاتێن جینۆسایدا شنگالێ هاتنە ئاشكراكرن
دهۆك، لەزگین جوقی:
نوونەرێ میرێ ئێزدیان دیار كر، ناسنامەیێن 39 روفاتێن جینۆسایدا شنگالێ هاتینە ئاشكاركرن و بڕیارە د رێورەسمەكی دا ل شنگالێ بهێنە ڤەشارتن.
جەهوەر عەلی بەگ، نوونەرێ میرێ ئێزدیان بۆ ئەڤرۆ خویا كر، دوهی 20/6/2023 نۆشداریا داد ل پارێزگەها نەینەوا 39 روفات رادەستی كەسوكارێن قوربانیێن جینۆسایدا شنگالێ كرن، پشتی پشكنینا DNA بۆ هاتیە ئەنجامدان و ناسنامەیێن وان هاتینە ئاشكراكرن، كو ل سالا 2014ێ ژ لایێ تیرۆرستێن داعشێ ڤە ل شنگالێ هاتبوونە كوشتن و گۆت: «ئەڤ روفاتە ژ ناڤ گۆڕێن بكۆم ل شنگالێ هاتینە دەرئێخستن، هێشتا سەدان روفاتێن جینۆسایدا شنگالێ ماینە و ناسنامەیێن وان ئاشكرا نەبووینە، لەو ئێزدی بەردەوام داخوازا ڤەكرنا گۆڕێن بكۆم ژ بەغدا دكەن».
