ناسنامەیەكا بەرزە
مستەفا مەلا سلیم ئاكرەیی
گەر جارەكا دی تو زڤری
وەكی جارا ئەز ناهێمە پێشوازیا تە
لسەرێن كۆلانا ڕاوەستم
جادەیێن مە هەمی یێن مەست بووین
باژێڕێن مە.. هەمی یێن مشت بووین
گوندیێن مە هەمی یێت دخەوچووین
ل دەمی باران دباریت،
ئەسمانێ مە دبیتە هەڕی.. عەردێ مەژی
ژمێژە وەرە مەیەكا تیژ یا ڤەخواری و
دهناڤێن خۆدا.. یا ئەرنی
گەر تو زڤڕی و ڕاست و ڕاست بەرەڤ منڤە هاتی
نزانم دێ تە ناسمەڤە..
دەسهەلاتا عشقا جارا دێ من هەبیت!
بەژنا تە بپیڤمەڤە
بەری نێزیكی من ببی.. بیاڤەكا هەستێن خۆ
دێ بۆ تە هێلم.. هندی ڕوند دچاڤێن مندا هەنە
دێ كەم خەنا و دەست و پێن تە دێ پێ شێلم
بەری خوداڤەندێن هەلامەتا بمرن
بەری فریشتە یێن نژدە.. دبەفرێ ڕا ب خەندقن
ب قەد دووریا عەردو ئەسمانا دێ هۆزانا
ب تە ڤەهینم.. بەلكی دەمێ ڕۆندكێن
فریشتا ڤەدڕەسیێن.. ل ڤێ دەردۆرێ
ژجیاتی گیایی مرۆڤێن نوی.. مرۆڤێن
ئەسمانی و خودایی.. لناڤ مێرگا
سینگێ تە شین ببن..
هینگی ب دروستی دێ دلەشێ تەدا بوهژم
پەیڤێن عشقاتە دێ لبەر خوها لەشێ من
بەشن و سترانێن خودایی د بێژن
دێ بزڤڕە.. ژمێژە وەرە ل هیڤیا تەمە
گەر توهاتی.. باوربكە.. باو .. و بارۆڤە
خۆلەكەكێ دێ بێدەگ بن و ڕاوەستن
هندی گەمیێن دەریا هەنە..
دێ بەرەڤ كنارا هێن و ل پێشوازیا تە ڕاوەستن
هندی تەیر و تەوال هەنە لسەر تێلێن
ئەستوینا دێ ڕێزبن و سترانا
ب هاتنا تەبێژن.. ئەز ژی دێ سترانەكا
خودایی بۆ تە بێژم و
سەمفۆنیەكا كەونی بۆ دێر و مزگەفتا
دێ ژەنم.. و بانگەكێ نوی..
دێ هەلدێرم..
داكو عەور و ئەسمان و هەلم
سێبەرا خۆ.. لتە بكەن
مافورەكا سۆر بۆ تە ڕایێخن و
دەروێش دبەرڕا حالی بكەن..
ئەو ناسنامەیا من یا ل وێراهە بەرزەبووی
نڤیسین هەمی یا لسەر مای .. تنێ.. تنێ
ناڤێ وەلاتێ من یێ لێچووی و
بەروەبووی..
دێ هەلگرم و ب درا مرادا ڤەكەم
بەلكی بالندەیەكێ برسی
هێلینا خۆ پێ چێكەتن..
یان ڕیڤینگەك بێت و ب نەچاریڤە
بۆ ڕێكەكا قاچاغ بەتن.. و
وارەكێ گەرم بۆ زاروكێن خۆ ئاڤا كەتن.
