ناسناڤێ كۆپا ئیراقێ دێ بۆ ئێك ژ یانەیێن بەهدینان بیت
بۆ جارا ئێكێ د دیرۆكا خوە دا و ل سەر ئاستێ یانەیێن كوردستانێ هەردو یانەیێن دەڤەرا بەهدینان تیما فوتبۆلا یانەیا دهۆك و یانەیا زاخۆ پێنگاڤا دووماهیێ بۆ ب دەستڤە ئینانا ناسناڤێ كۆپا ئیراقێ هاڤێژت پشتی شیایین د یاریێن خوە یێن پێش دووماهیێ دا ب سەركەڤتن ل سەر یانەیێن بەغدایی تیما جەوییە و تیما شورتە و دەربازنە فینالێ.
تیما ئەلهۆیێن چیا یانەیا دهۆكێ ب سێ گۆلان بەرانبەر گۆلەكێ سەركەڤتنێ ل سەر مێڤانا خوە یانەیا جەوییە ئینا، د یارییا واندا ئەوا ل شەڤا دەربازبوو بەرهەڤبوونا هژمارەكا ئێكچار زوور یا پشتەڤانێن ئەلهۆیێن چیا ل یاریگەها یانەیا دهۆكێ ژ چارچووڤەیێ قۆناغا پێش دووماهییا كۆپایێ هاتیە كرن.
هەر د شەڤا دەربازبووی دا و د هەمان دەمدا نوونەرا دویێ یا بەهدینان یانەیا زاخۆ شیا ل سەر كیستێ قارەمانا ئیراقێ یانەیا شورتە دەربازبیتە یارییا دووماهییا كۆپایێ، ئەوا هژمارەكا ئێكچار زوور ژ پشتەڤانان بەرهەڤبووین، پشتی یاری و هەردو چارێكێن زێدەكری ژی بێ گۆل ب دووماهی هاتین، ب لێدانێن پەنەلتییا بۆ بەرژوەندییا زاخۆ ب دووماهی هات.
دهۆك بەر ب دیرۆكەكا نوو
دنیڤا ئێكێ دا تیما دهۆكێ ئاستەكێ باش نیشان دا و شیان چەندین هێرشێن گۆلكرنێ بۆ تۆڕا جەوییە ببەن دەرئەنجامێ ئەوان هێرشان شیان گۆلا ئێكێ د خولا 16ێ دا بینن ئەوا ژلایێ پیشەكارێ لوبنانی كەریم دەرویشی تۆماركری، ئەڤ نیڤە ب گۆلەكێ ب دووماهی هاتی، دگەل دەستپێكرنا نیڤا دویێ د خولەكا 48 دا یانەیا جەوییە گۆلا وەكهەڤیێ ئینا، دخولەكا 59ێ یاریزانێ جەوییە نارتی پۆلۆ ب كارتا سۆر هاتە دوورئێخستن، دماوەیێ مایی یێ یاریێ دا ئاستێ یاریێ بهێزتر لێهات تا خولەكا 88ێ پێشەكارێ لوبنانی ڤەگەڕیا و گۆلا دویێ بۆ تیما خوە دهۆكێ ئینا، تیما دهۆكێ نە ڕاوەستیان و شیا گۆلا سێیێ د خولەكا 90+5ێ ژلایێ كاپتنێ تیمێ هارۆن ئەحمەد بینیت.
زاخۆ چاڤ ل ناسناڤی و چامپیۆنزا ئاسیایە
ژلایێ خوەڤە د هەردو نیڤێن یارییا زاخۆ بەرانبەر شورتە دا ئەنجام بێ گۆل وەكهەڤی ب دووماهی هاتبوو ئەوا چوویە چارێكێن زێدەتری، هەر دماوەیێ هەردو چارێكێن زێدەتری دا یاریزانێن زاخۆ هەموو بزاڤكرن لێ ئەڤ هەردو نیڤە ژی بێ گۆل ب دووماهی هات و یاری چوو لێدانێن سزایێ بۆ ئێكلاكرنا تیما دەربازبووی بۆ یارییا دووماهیێ، د لێدانێن پەنەلتیان یانەیا زاخۆ شیا ب ئەنجامێ 4-3 گۆلان ب سەركەڤیت و پلێتا دویێ یا كۆپا ئیراقێ ب دەستڤە بینت.
كەنگی یارییا فینالێ یە؟
بڕیارە یارییا دووماهییا كۆپا ئیراقێ ل 16ێ ڤێ مەهێ یاریگەها شەعب یا نێڤدەولەتی ل پایتەختێ ئیراقێ بەغدا بهێتە كرن، دبیتە جارا ئێكێ د دیرۆكا خوە دا هەردو یانەیێن پارێزگەها دهۆكێ و نوونەرێن دەڤەرا بەهدینان و كوردستانێ دەربازبنە یارییا فینالێ و دبیتە جارا ئێكێ ژی دو یانەیێن پارێزگەهان دگەهنە ڤێ قۆناغێ.
بۆ زانین كۆپا ئەڤ سالە دبیتە یا 26ێ دهێتە كرن، یانەیا زەورا پترترین ناسناڤ ب دەستخوەڤەئیناینە كو 15 جاران بوویە قارەمان، جەوییە چار جاران، هەر ئێك ژ تەلەبە، ئەلرەشید، جەیش جودا دو ناسناڤ ئیناینە و سیناعە جارەكێ بوویە قارەمان.
