ناسناڤێ خولا ئیراقێ ئێكلابوو
ئیحسان حەسەن
سەرباری هندێ كو تنێ پێنج گەر ماینە ژ هەڤركیێن خولا ستێرێن ئیراقێ یا فوتبۆلێ، چونكو یاریا هژمارە ئێك ل جیهانێ هووسا نیشامەدایە ئەو باوەریێ ب پێشبینیان و لوژیكێ نائینیت، ئەز هووسا دبینم ناسناڤێ ڤی وەرزی تنێ دێ دناڤبەرا دو یانەیان دا هێتە ئێكلاكرن، ئەوژی یانەیێن شورتە هەلگرا ناسناڤی و زەورا، ژبەركو لدووڤ رێزبەندیا نها چەنسێ وان ژ هەموو یانەیێن دی پترە ژبۆ بدەستڤەبرنا ناسناڤێ خولێ، رەنگە هندەك ژ چاڤدێران هووسا ببینن كو یانەیا دهۆك هێشتا چەنسێ هەڤركییێ مایە، ئەگەر شیا سەركەڤتنێ دهەموو یاریێن خوە یێن پاشئخستی دیسان یێن مایی بینیت، لێ بگورەی ئاستێ تیمێ و هاتنا خوارا شیانێن جەستەیی یێن زۆربەی یاریزانان، نەبوونا پێكهورێ سەركەڤتی و گڤاشتنێن لسەر تیمێ هەین، ئەو تەكتیكا نها یاریێ پێ دكەت و ژدەستدانا چەندین خالان دگەل تیمێن رێزبەندیێن خوارێ ئەز باوەرناكەم بشێت بگەهیتە ئارمانجا خوە، ژبەركو شەرێ بدەستڤەئینانا خالان دێ دگەرێن داهاتی دا خورتر لێ هێت، هەر چەندە یانەیا زاخۆ ژی ب دو سەركەڤتنێن خوە یێن مەزن و تۆماركرنا حەفت گۆلان دهەردو گەرێن بوریدا شیا رێزبەندیا سێیێ بەروەخت پارێزیت، لێ جوداهییا 12 خالان دگەل خودانێن رێزبەندیێن ئێكێ و دویێ یامەزنە، پێدڤییە لسەر دهەموو یاریێن خوە یێن مایی دا سەركەڤتنێ بینیت ب مەرجەكی زەورا و شورتە ب كێماسی د چار یاریێن خوەدا بهێنە دۆراندن، ئەز دبێژن ئەڤە ژی بزحمەتە، دخولەكێ دا شاشیێن كوژەك یێن دادڤانان، دیسان ناوچەگەری و تیمێن پایتەختی لسەر كیستێ تیمێن كوردستانێ، هەتا ئاستێ وان ژی، هەموو رێگرن كو كورێن خابیری ئەوا پێدڤی بدەستڤە بینن، ئەگەر ئەڤە رەوشا تەكنیكی یا تیمێن پێشییێ بیت، لدووڤ حیساباتان ئێك ژ یانەیێن شورتە زەورا تا رادەیەكێ بهێز دێ بیتە قارەمانا خولا ڤی وەرزی، هەرچەندە هێشتا هەڤركی و یاریێن ڤەبر دناڤبەرا زۆربەی تیمێن خولێ ماینە، شەرێ دەستنیشانكرنا رێزبەندییا سێیێ و چوارێ هێشتا یێ بەردەوامە، ژبەر كو پتر ژ دو تیمان هەڤركییێ لسەر دكەن ئەوژی دهۆك، زاخۆ و تەلەبە، ئەز دبینم دەلیڤەكا زێرینە بۆ هەردو نوونەرێن هەرێما كوردستانێ و پارێزگەها دهۆك ڤێ رێزێ بدەستڤە بینن ئەگەر شیان چارەسەریا وان خالێن لاواز دناڤا تیما خوەدا بكەن و كار لسەر پاراستنا خالێن خوە یێن بهێز بكەن، بەلكو بشێن قارەمانییەكا دەرڤە بدەستڤە بینن، هەر ئەڤەیە رەوشا گوپیتكا خولێ، دەرباری تیمێن بنێ لیستێ ژی دیارە حدود تارادەیەكی كەربەلا بریارا خوە یاچوونێ ژخولا مەزنان داینە، نها دیالا و نەفتا بەسرا یا شەری بۆ مانێ دخولێدا دكەن، یێن ناڤەراستا خولێ ژی تشتێ دلخۆش ئەوە نەورۆز و هەولێر ژ بازنێ مەترسییێ دووركەڤتینە و مانا خوە دخولێ دا مسوگەركرینە، هەر چەندە د شیاندابوو رێزبەندییا وان باشتربا، ئەگەر رەوشا وان یا كارگێری و تەكنیكی یا جێگیر با و مفا ژ سەربۆرێن پێشیین وەرگرتبان.
