نامه‌كا ڤه‌كری بۆ وه‌زاره‌تا په‌روه‌ردا هه‌رێما كوردستانێ
هه‌لبه‌ت كه‌رتێ په‌روه‌ردێ گرنگترین بنكێ ئاڤاكرنا جڤاكی یه و قوتابی به‌رێ بنیاتا هه‌موو وارێن ژیانێ یه ژبه‌ر رۆلێ وان كو دێ ل پاشه‌رۆژێ ببن سه‌ركرده و فه‌رماندێن وه‌لاتی؛ و به‌رهه‌ڤكرنا وان بشێوه‌كی ساخله‌م وه‌ك پێدڤی ئه‌ركێ حكومه‌تێ یه هه‌كه مه بڤێت ببین ده‌وله‌ته‌كا پێشكه‌فتی وسه‌ره‌رای كو هه‌تا نوكه مه ده‌وله‌ت نینه و ئه‌مێ دشه‌ره‌كێ مان و نه‌مانێ داینه، دگه‌ل دوژمنێن ئازادیا كوردستانێ و ژ ئه‌جیندێن ده‌ره‌كی و نافخۆیی و داعشێ و گه‌نده‌لیا دایه ب سه‌ر هه‌موو مۆڤكێن وه‌لاتی ڤه، هه‌كه ئه‌م خوه به‌رهه‌ڤ نه‌كه‌ین و نفشه‌كێ زانا و وكوردپه‌روه‌ر و چاڤنه‌ترس وخوه‌راگر ود ه‌ستپاك به‌رهه‌ڤ نه‌كه‌ین دێ مه‌حالبیت بچینه ناڤ رێزێن وه‌لاتێن پێشكه‌فتی و زانا ؟ و هه‌كه “قوتابی سه‌رێ رمێ بن دهه‌موو شۆره‌ش” و سه‌ر هلدانان دا و به‌رێ بنیاتێ ئاڤاكرنا جڤاكایه و ئه‌مانه‌تێ سه‌ر وژدانا خوَدان بریار و ده‌سهلاتدار و به‌رپرسایه و ل ڤان بار و دۆخێن نوكه دا قوتابخانێن مه بووینه وه‌كی بنكێن نه‌هێلانا نه‌خوینده‌واریێ و ئاستێ زانستی زۆر دابه‌زیه و ژ ئه‌گه‌رێ گه‌له‌ك هۆكاران ؟؟
1- كێمیا میلاكێن قوتابخانان ژ مامۆستایان و ڤاله‌هیی ب وانه بێژا تێنه پركرن كو پێزانین نینن ل سه‌ر گوتنا بابه‌تان و ده‌رونزانیا قوتابیان.
2- زۆریا قوتابییان د پۆله‌كێ دا كو مامۆستا نكارن بدرستی كۆنترۆلا پۆلا بكه‌ن و بابه‌تان بگه‌هینن.
3- كێمیا خۆلێن شیاندنا مامۆستایان و بتایبه‌ت یێن بسپۆرێن بابه‌تان.
4- نه‌بوونا هاریكاریان بۆ قوتابییان وه‌كی پێنووس و تێنووس و ژێبه‌ر ژلایێ حكومه‌تێ ڤه.
5- زۆربه‌ی مامۆستایان خوه به‌رهه‌ڤ ناكه‌ن و ئاستێ خوه یێ بسپۆری پێش نائێخن و سزا دان ل سه‌ر نزمیا رێژا سه‌ركه‌فتنێ نا ئێته كرن.
6- زۆربه‌ی مامۆستایان هێشتا باوه‌ری ب قه‌ده‌غه‌كرنا لێدانی نینه و بكار تینن و بڤێ چه‌ندێ ڤالاتیه‌ك و دابڕینه‌كا مه‌زن د ناڤبه‌را قوتابی ومامۆستای دا په‌یدا دبیت و قوتابیه‌كێ له‌رزۆك و ترسنۆك و بێ هه‌له‌ویست په‌یدا دبیت و ناخوینن.
7- رۆلێ سه‌رپه‌رشتان لگۆر سیسته‌می نوو نه‌مایه كاریگه‌ر وئه‌ڤه بدیتنا مه كاره‌ساتا مه‌زنه ل سه‌ر ئاستێ زانستێ و رێژا سه‌ركه‌فتنێ.
8- به‌رێ دڤیا سه‌رپه‌رشت سالانه سێ سه‌ره‌دانا بكه‌ت بۆ هه‌ر قوتابخانه‌كێ و ل گۆر سیسته‌مێ نوو بتنێ دوو سه‌ره‌دان ماینه و بسه‌دان قوتابخانه دمینن بێ سه‌ره‌دان و هه‌ر ئێك ب دلێ خوه ده‌وامێ دكه‌ت بێی چاڤدێری.
9- ئه‌و رێڤه‌به‌ر و مامۆستایێ بزانن سه‌ره‌دان نینن دێ وه‌كی خوه ده‌وامێ بكه‌ن دزانن كه‌س نایێت دیفچوونا وان بكه‌ت ود ه‌وام ئیفلیج دبیت، هه‌لبه‌ت نه هه‌موو به‌لكو هنده‌ك ژ وان دگه‌ل رێزێن مه بۆ هه‌موو دلسۆزان.
10- هه‌كه بسێ سه‌ره‌دانێن سه‌رپه‌رشتان وژبلی سه‌ره‌دانا بله‌ز وسه‌ره‌دانێن ئه‌زمونان رێژا سه‌ركه‌فتنێ ژ25%بتر نه‌بوو گه‌لۆ بدوو سه‌ره‌دانا دێ ئه‌و رێژه چه‌ندبیت ؟؟؟؟
11- به‌رێ هه‌موو رۆژێن هه‌یڤێ ژبلێ رۆژێن بێهنڤه‌دانان سه‌رپه‌رشتی ماف هه‌بوو ل دووف به‌رنامێ كاری سه‌ره‌دانا بكه‌ت به‌لێ ل سیسته‌مێ نوو بتنێ بۆ -12 رۆژا سه‌رپه‌رشتی ماف هه‌یه سه‌ره‌دانا بكه‌ت و بسه‌دان قوتابخانه دێ مینن بێ سه‌ره‌دان و ئه‌ڤه ڤالاتیه‌كا مه‌زن دئێخیته ده‌وامێ ورێك وپێكیا وێ.
12- ئه‌ڤ خالێن ل سه‌ری زۆربه‌ی وان مه دگه‌ل رێڤه‌به‌رێ سه‌ر په‌رشتان ل وه‌زاره‌تێ دان و ستاندن ل سه‌ر كرن و مه‌ترسیا وان خالا دیاركر ده‌مێ به‌رهه‌ڤیا كۆنگره‌ی ل دهوكێ هاتیه كرن كو ئه‌ز د ته‌وه‌رێ گه‌نگه‌شا سه‌ر په‌رشتیێ دا ئه‌ندامبووم لێ مخابن بۆچوونێن مه سه‌رنه‌گرت و ئه‌وان ئه‌و په‌سندكر یا وان گوتی وجهێ داخێ یه رێڤه‌به‌رێ سه‌رپرشتیا په‌روه‌ردا گشتی یا دهوكێ پشته‌ڤانێ بۆچوونێن وان بوو.
جهێ داخێ یه ئه‌ڤ ئاریشه نه‌خه‌ما كه‌سی یه و هه‌كه قوتابیێ پۆلا شه‌شێ بچیته پۆلا هه‌فتێ و نزانیت ناڤێ خوه بنڤیسیت نه‌گونه‌ها وی یه؟ به‌لكو گونه‌ها مه و ڤی سیسته‌می یه و هه‌كه چه‌ندساله‌كێن دی له‌شكه‌ره‌كی نه‌خوینده‌وار هاته گۆڕه‌پانێ ئه‌وژی گونه‌ها مه و ڤی سیسته‌می یه چنكو مخابن رۆلێ سه‌رپه‌رشتی نه‌هاتیه به‌رچاڤكرن وه‌ك پێدڤی كو ئه‌وه ل گۆڕه‌پانا كرداری و دزانیت ئێش وده‌ردێ قوتابخانان. هیڤیدارم ئه‌ڤ خالێن ل سه‌ری هاتین دیاركرن بێنه ڕه‌چاڤكرن به‌ری بارێ مه بگه‌هیته سه‌ر شاخێن گایی و پاشی په‌شیمانی مفای ناده‌ت دگه‌ل رێز وپێزانێن مه بۆ هه‌ر مامۆستایه‌كێ دلسۆز و وه‌لاتپارێز و كوردپه‌روه‌ر. و ل خه‌له‌كا بهێت دێ ل سه‌ر ئه‌رك و رۆلێ سه‌رپه‌رشتی و كاریگه‌ریا وی نڤیسین ژبۆ خزمه‌تا زارۆكێن مه، سه‌ركرده و فه‌رماندێن پاشه‌رۆژا مه.
