نامهك بۆ رێڤهبهریا كارهبا ئامێدیێ
ههمى دهمان ل ههر وهلاتهكى ئهگهر كارهكێ لاواز د كارێن مروڤى دا بهێته دیتن مرۆڤ وێ لاوازیێ نهبینیت ژى، چاڤێن كهسێن دهروبهر د ڤهكرینه و ئاگهه ژ ههر تشتهكێ ههیه، لهورا مرۆڤ ب خوه ژى دزانیت نها گهرما هاڤینێ چهندا دژواره و ژ نیعمهتا خودێ و حكوومهتا ههرێمێ كارهبا نیشتیمانى ژى یا خراب نینه، لێ ئهگهر كولانهكێ كارهب ههبیت یان دهڤهرهك خودان كارهبا باش بیت نه رامانا وێ چهندێ یه ههر كهسهكى ب كارهبا نشتیمانى شاد و دلخۆشه، مهخواست ڤێ گوتارێ وهكو نامهكا ڤهكری ئاراستهى رێڤهبهریا كارهبا ئامێدیێ بكهین.
جهنابێ ههوه هایداره كو نها پلێن گهرمێ ل دهڤهرا مه ژ سهدێ د چهندێ دانه و دهمێ ب رۆژ بیت دونیا گهرمهكا ئێكجار مهزنه و جاددێن مه ژ گهرما دا پهنایێ و ههوارا خوه بۆ ههر جههكێ دبهن، لێ ئهم دبینین ل وى دهمێ گهرمێ جادێن مه دبنه رۆناهى كو مه ل دهمێ رۆژێ پێدڤى ب چ رۆناهیا سهر جادهیان نینه، بهلكو ب رۆژێ مه پێدڤیا پێ ههى بۆ نزمكرنا گهرمێ د ناڤ ههر مالهكێ دا و ب دهمێ ب شهڤ داكو وان جادهیان بۆ مه رۆناهیێ لێ پهیدا بكهن ئهو جادهیێن دبنه سهدهما پهیدابوونا روودانان.
رۆژهكێ ل دهمێ بانگێ نیڤرۆ ل ئامێدیێ بلند بووى مه قهستا مالا خودێ كر، لێ بهس خودێ دزانیت مه برێڤه چ دیت و چ ههلویستێ مێرخاسى و مهردینیا ههوه بۆ مه دیار بوو، جهنابێ رێڤهبهر ب تنێ ئهو كولانا ئهم تێدا دهرباز بووین بۆ ئێك ژ مزگهفتێن ئامێدیێ ب تنێ د وێ كولانێ دا مه نێزیكى (20) ستوونێن كارهبا نیشتیمانى دیتن، لێ خوزى سهد جارا خوزى ب تنێ دیتن با، بهلكو د ههر ستوونهكێ دا روناهیهك ژێ دیار دبوو مه دیت وێ نیڤرویێ كارهبا نیشتیمانى یا ههى و گلۆپێن ههلكرینه و ب كارێ خوه یێ نشتیمانى رادبن، ئهو ستوونێن مه دیتین كو پترى ژ (20) ستوونان بوون ب تنێ د كولانهكێ دا كا دا بۆ ههوه پتر رۆن بكهین، ههر ستوونهكێ گلوپهك یا ههلاویستى یه و بێگومان ههر گلوپهكا ژ وانا (2) ئهمپێرێن كارهبێ دمهزێخیت، بیست ستوون ئهڤه (40) ئهمپێر ب تنێ د كولانهكا ئامێدیێ دا هاتنه مهزاختن ئهرێ ب تنێ ل وێ كولانێ ستوونێن كارهبێ ههنه؟ بهلكو ههر كولانهكێ وهك وێ كولانێ (20) ستوون ههنه و ههر ل سهر جاددا سهرهكیا دهۆك ئامێدیێ ئهڤ ستوونه دههلاویستینه، ل دهمهكی ئهو مزگهفتا مه نڤێژا نیڤرۆ لێ كرى كارهب نهبوو !!! ل وێ گهرمێ ههر چ نهبیت موبهریده یان پانكهكێ یان ههر ئامیرهكێ دى یێ كارهبێ بۆ خوه ب ههلكهن!
د ههمان ههلویستێ نیشتیمانى دا ب رۆژ و كارهب ههبیت ههلویستێ مهردینیێ یێ دیاره و ئهو گلوپ ل سهر وان جادهیان دههلكرینه ئهرێ دێ چهوا كارهبا نیشتیمانى هێته پاراستن؟ ئهرێ ئهڤهیه ههستێ نیشتیمانى؟ ئهرێ و سهد ئهرێ یێن دى د گهوریا من دا مانه و نا دهركهڤن، لهورا هیڤیه هوین ب كارێ خوه یێ نیشتیمانى راببن و چارهسهریهكێ بۆ وان ستوونێن كارهبێ پهیدا بكهن.
