نامەیا شەھیدەکی
مستەفا مەلا سەلیم ئاکرەیی
دەمێ دزڤرم .. ئەز نزانم
دێ ژمنڤە ھێی و
من ئێخییە باوەشا خوە
یانژی .. دگەل ئاوازێن ئورکسترایەکا
ھەڤچەرح.. لەیزی و
کراسەکێ بودوکس.. کەیە بەرخوە
نزانم دێ یا چەوابی ..!
گەر وەک جاران.. کراسێ تە
یێ بویکینیێ بەفر بیت
چێدبیت ھینگی تو دلەشێ من دا
دبوھژی .. یانژی تو یا خەووکیبی
لسەر پەرتووکا دلێمن
دیسا دخەوار بچی و .. پێبکژی
ھەمی بیرھاتنێن من ..
بکەیە بارانەکا نەفرەتێ و
بدەیە بەر شەنەبای و ب ھەلاڤیژی
ئەو دارستانا ھێژ خوینا من ..
پێڤە ھشک نە بی
بێخییە بەر ڕەنیەکا بەفرێ
گورکێن دەف بخوین بەردەیێ
ئەز نزانم.. ئەو نامەیێن
من بۆتە ھنارتین گەھشتینە؟
یانژی ھێشتا ب ڕێڤە ماینە
یانژی کەفتیە دناڤ دەستێ
چەتەیەکی..؟
شەڤ ژی ئەژدەھایەکێ ب ترسە
نھێنیا دەریایێ نا ڤەشێریت
ھەمی بەلە م ..ھەمی پاپۆر
ل سپێدەھییان ل کنارێ خوە ڕادەستن
بێھنا ئاخێ.. بێھنا ڕۆژێ
ژکویر ھەلدکێشن
تنێ جەردە و نژدەڤانێن شەڤێ نەبن
ھەردەم ھشیارن.. نانڤن
لسەر ھێلێن شەمەندەفڕێ
ئاگری دزن.. پەیامان دسۆژن و
ناھێلن بگەھن ..
گەلەگ دترسم دەما دزڤڕم
ڕۆژ ھەلامەتەکێ دژواربیت
کراسەکێ ھەلزیڕیایی دبەردا بیت
ژدەھمەنێن وێ ..
چپکێن خوینا برینێن من..
ڤێدا بھێن..
تەڤ نامە و پەیامێن من
بھێنە لویلدان و
گول بەڕۆژی تێدا بفرۆشن
لسەر گوڕێ شەھیدەکی..
ستران و لاڤژا بێژن.
